काठमाडौँ — सगरमाथा ग्यास उद्योग प्रालिले जोखिममा रहेका पुराना सिलिन्डहरु नष्ट गरेको छ । काभ्रेको बनेपा नगरपालिका–४ थापागाउँमा रहेको उद्योगले आइतबार ३ हजार ३० थान असुरक्षित तथा पुराना सिलिन्डर नष्ट गरेको हो ।

उपभोक्ताको हितलाई मध्यनजर गर्दै उद्योगले असुरक्षित तथा लिकेज भएका, फुटरिङ नेकरिङ बिग्रिएका, म्याद गुज्रिएका र हाइड्रोलिक परीक्षणको क्रममा फेल भएका सिलिन्डर नष्ट गरेको हो । आयल निगम, गुणस्तर तथा नापतौल विभाग, स्थानीय जनप्रतिनिधि, उपभोक्ता अधिकारकर्मीसहितको रोहोबरमा आइतबर सिलिन्डर नष्ट गरिएको हो । 

‘गत वर्षको बाढीले केही सिलिन्डर बिग्रने अवस्था आयो । बिग्रेको सिलिन्डर नष्ट गर्न आयल निगमको निर्देशन पनि थियो,’ आइतबार आयोजित सिलिन्डर नष्ट गर्ने कार्यक्रममा उद्योगका सञ्चालक सावरमल अग्रवालले भने, ‘बजारमा राम्रो र दुरुस्त ग्यास सिलिन्डर उपलब्ध गराउन पुराना सिलिन्डर नष्ट गरेका छौ ।’

सगरमाथा ग्यास उद्योगले सगर ब्रान्डको सिलिन्डर बिक्री गर्दै आएको छ । आइतबार नष्ट गरिएको सिलिन्डर गत भदौदेखि अहिलेसम्मको हो । ‘विगतमा पनि संकलन गरी नष्ट गर्थ्यौँ । औसतमा ३ देखि ५ सय सिलिन्डर नष्ट हुन्थ्यो । यसपटक बाढीले धेरै समस्या भयो । एक वर्षको अवधिमा ३ हजार बढी सिलिन्डर संकलन गरेका छौँ, संकलनको क्रम अझै जारी नै छ,’ उनले भने, ‘संकलन गरिएका सिलिन्डर सबै परीक्षण हुन्छ । मापदण्डभित्र नपर्ने सिलिन्डर नष्ट गरेका छौँ ।’