कास्की — पर्यटन क्षेत्रमा रुचि भएका २ सय ८१ जनालाई ट्रेकिङ गाइड र पोर्टर तालिम प्रदान गरिएको छ । ट्रेकिङ एजेन्सिज् एसोसिएसन आफ नेपाल (टान) गण्डकीको आयोजनामा पोखरामा उनीहरुलाई तालिम दिइएको हो । 

२ सय २१ जनाले २८ दिनको ट्रेकिङ गाइड र ६० जनाले १५ दिनको पोर्टर गाइड तालिम लिएका हुन् । ट्रेकिङ गाइड तालिम लिनेमध्ये २४ जना असफल भएको टान गण्डकी अध्यक्ष कृष्ण आचार्यले बताए । ‘प्रमाणपत्र पाउने सबै लाइसेन्स पाउन योग्य हुनुभएको छ । त्यही प्रमाणपत्रको आधारमा पर्यटन कार्यालयबाट लाइसेन्स प्राप्त हुन्छ,’ उनले भने । 

प्रशिक्षार्थीलाई मंगलबार गण्डकी प्रदेशका मुख्यमन्त्री सुरेन्द्रराज पाण्डेले प्रमाणपत्र प्रदान गरे । उक्त अवसरमा मुख्यमन्त्री पाण्डेले दक्ष जनशक्ति पर्यटन क्षेत्रको महत्वपूर्ण अंग भएको बताए ।