पर्सा — चालु आर्थिक वर्षको पहिलो अर्थात् साउन महिनामा वीरगन्ज भन्सार कार्यालयले १८ अर्ब ३९ करोड ६७ लाख रुपैयाँ राजश्व संकलन गरेको छ । यो मासिक लक्ष्यको ८७ दशमलव ६८ प्रतिशत मात्र हो । यो महिनामा २० अर्ब ९८ करोड २१ लाख रुपैयाँ राजश्व संकलनको लक्ष्य यो भन्सारले पाएको थियो ।

देशकै दुई ठूला भन्सार कार्यालय वीरगन्ज भन्सार कार्यालय र सिर्सिया सुक्खा बन्दरगाह भन्सार कार्यालय गाभिएको पहिलो महिनामा यो भन्सारले यति परिमाणमा राजश्व संकलन गर्न सकेको हो ।

वीरगन्ज भन्सार कार्यालयका प्रमुख भन्सार प्रशासक दीपक लामिछाने पेट्रोलियम पदार्थको आयातमा कमी र वर्षायाम पनि भएकाले मासिक राजश्व असुली लक्ष्य भेट्टाउन नसकिएको बताउँछन् । तर गत आर्थिक वर्षको साउन महिनामाभन्दा चालु आवको साउन महिनामा भने बढी राजश्व संकलन गर्न सफलता मिलेको उनले बताए ।

गत आवको साउन महिनामा यो भन्सारले १२ अर्ब १६ करोड ३२ लाख रुपैयाँ राजश्व संकलन गरेको थियो । उक्त महिनामा १६ अर्ब ८६ करोड रुपैयाँ राजश्व संकलन गर्ने लक्ष्य थियो । यसरी तुलनात्मक रूपमा गत आव साउन महिनाको लक्ष्यभन्दा पनि बढी यो चालु आवको साउन महिनामा यो भन्सारले राजश्व संकलन गरेको उनले बताए ।