परासी — किसानले मल नपाइरहेको समयमा कृषि सामग्री कम्पनी लिमिटेड परासीमा आएको मल गोदाममै थन्किएको छ । सहकारीमार्फत मल वितरण गर्दै आएकामा सहकारीले समयमै मल नलगेपछि गोदाममा मल थन्किएको हो । 

धान गोड्ने बेला भएकाले किसानलाई भने मल आवश्यक छ । तर सहकारीले मल नलैजाँदा किसानले पाएका छैनन् ।

भारतीय सीमासँग जोडिएका पालिकाका केही किसानले भारतीय बजार गएर मल ल्याए पनि अधिकांशले अभाव बेहोरिरहेका छन् । जिल्लामा ७७ वटा सहकारीमार्फत मल वितरण हुँदै आएको छ । तर अहिलेसम्म ३४ सहकारीले मात्र मल लगेका छन् । साउन १९ मा कृषि सामग्री लिमिटेडमा आएकोमध्ये १ सय ३६ टन गोदाममा छ ।

पालिकाले सिफारिस गरेअनुसार आफूहरूले मल वितरण गर्दै आएको कृषि सामग्री कम्पनीका शाखा परासीका प्रबन्धक ताराप्रसाद खनालको दाबी छ । मल आएको एक साता मात्र भएकाले केही सहकारीले मल लगेको र अन्यले पनि प्रक्रिया अगाडि बढाएको उनको भनाइ छ ।