पर्सा — सिर्सिया सुक्खा बन्दरगाह सञ्चालनको जिम्मेवारी पुनः भारतीय कम्पनी प्रिस्टिन मेगा लजिस्टिक पार्कले पाएको छ । बिहीबारदेखि यो कम्पनीले थप ५ वर्षका लागि बन्दरगाह सञ्चालनको जिम्मेवारी पाएको हो । यसअघि यसै कम्पनीले नेपाली कम्पनी भ्याली टर्मिनल प्रालिसँग ज्वाइन्ट भेन्चरमा प्रिस्टिनन भ्याली कम्पनीका नामले ५ वर्ष यो बन्दरगाह सञ्चालन गरेको थियो । 

प्रिस्टिन मेगा कम्पनीका कन्ल्सन्टयान्ट/सल्लाहकार हेमेन्द्रमोहन शाहीका अनुसार इन्टर मोडल यातायात विकास समितिले आह्वान गरेको टेन्डरमा प्रिस्टिन मेगाले अर्को भारतीय कम्पनी कोंकर कर्पोरेसन इन्डियासँग मुख्य प्रतिस्पर्धा गरेको थियो । प्रिस्टिनले ४ अर्ब ७१ करोड रुपैयाँमा टेन्डर सकार गरेको हो । कोंकरले भने ४ अर्ब ५० करोड ९० लाख रुपैयाँमा बन्दरगाह सञ्चालन गर्ने घोषणा गरेको थियो । कोंकर भारतीय रेल्वेको भगिनी संस्था हो ।

सन् २००४ देखि सन्चालनमा आएको सिर्सिया सुक्खा बन्दरगाह नेपालको पहिलो र ठूलो सुक्खा बन्दरगाह पनि हो । ३८ हेक्टर क्षेत्रफलमा फैलिएको यो बन्दरगाहको अधिकतम क्षमता १ हजार ५ सय ८६ कन्टेनर हो । तर सधैं क्षमताभन्दा बढी कन्टेनर व्यवस्थापन गर्नुपर्ने दायित्वको कारण बन्दरगाह सन्चालक कम्पनीलाई समस्या हुँदै आएको छ । भारतीय रेल्वे सञ्जालसँग जोडिएको यो बन्दरगाहबाट भारतको कोलकाता, हल्दिया र विशाखापटनम बन्दरगाह हुँदै मालवस्तु आयात निर्यात हुने गर्छ । भारतबाटै पनि चिनी, रासायनिक मल, फलाम, कोइला आदि बस्तु आयात हुने गरेको छ ।

इन्टरमोडल यातायात विकास समितिले स्थापनाकालदेखि नै निजी क्षेत्रलाई यो बन्दरगाह सञ्चालन गर्ने जिम्मेवारी दिँदै आएको छ । पहिलो डेढ दशक यो बन्दरगाह हिमालयन टर्मिनल कम्पनीले सञ्चालन गरेको थियो । उक्त कम्पनी पनि भारतीय कम्पनी कोंकरकै रहेको थियो ।

बन्दरगाहमा स्थापनाकालदेखि छुट्टै भन्सार कार्यालय रहेकामा चालु आर्थिक वर्षको सुरुवातसँगै वीरगन्ज भन्सार कार्यालयमा सिर्सिया सुक्खा बन्दरगाह भन्सार कार्यालय गाभिएको छ । अब वीरगन्ज भन्सार कार्यालय मातहत नै यो बन्दरगाह रहनेछ ।

शाहीका अनुसार, ५ वर्षको अवधिमा प्रिस्टिन भ्यालीले यो बन्दरगाहमा ३ हजार ४ सय ७१ कन्टेनरबाहक रेल्वे र्‍याक, १ हजार १ सय ७१ बोरा बन्द कार्गो सामान बोक्ने बीसीएन र्‍याक, ५ सय ४९ फलाम बोक्ने बीआरएन र्‍याक र २ सय ७९ खुल्ला वस्तु बोक्ने लुज र्‍याक गरी कूल ५ हजार ४ सय ७० रेल्वे र्‍याक परिचालन गरेको छ ।  

यस अवधिमा बन्दरगाहमा भारत तथा तेस्रो मुलुकबाट गरी ३ लाख ४ हजार २ सय ९५ मालबाहक कन्टेनर, २५ लाख ९६ हजार ८ सय ७ सय ७६ मेटन बोरा बन्द सामान, १३ लाख २ हजार १ सय ८ मेटन फलामजन्य बस्तु र १० लाख ३४ हजार ३ सय ३४ टन लुज कार्गो वस्तु आयात भएका छन् ।