मंगलबार नेप्सेले तीन हजार विन्दु पार गरेपछि लगानीकर्ताहरूमा नयाँ आशा जागेको छ, १७६ कम्पनीको सेयर मूल्य बढ्यो।
What you should know
काठमाडौँ — सेयर कारोबार मापक नेप्से परिसूचक मंगलबार ३०.७६ अंकले बढेको छ । अघिल्लो दिनको तुलनामा एक दशमलव शून्य ३ प्रतिशतले बढेर समग्र नेप्से ३ हजार २.०७ विन्दुमा उक्लिएको हो । यो करिब एक वर्ष (३१ साउन २०८१)यताकै उच्च हो । यस अघि ०८१ साउन ३१ मा नेप्से ३ हजार ८१ विन्दुमा पुगेको थियो ।
त्यसयता नेप्सेले तीन हजार विन्दु पार गर्न सकेको थिएन । गत आइतबार १२ः५१ बजे नेप्से ३ हजार १३ विन्दुमा पुगिसकेको थियो । त्यसपछि भने यो वृद्धि लामो समय टिक्न सकेन । अन्तिममा २९ सय ६४ दशमलव २० विन्दुमा ओर्लिएर बन्द भएको थियो । आइतबार १८.४४ अंकले घटेको नेप्से सोमबार ७ अंकले बढेको थियो ।
यसरी पछिल्ला केही दिनमा कारोबार अवधिमा नेप्से तीन हजार विन्दुभन्दा माथी पुगेर कारोबार भएपनि अन्तिममा उक्त अंकभन्दा मुनिनै ओर्लेर बन्द भएको थियो । यसकारण सेयर विश्लेषकहरूले नेप्सेले तीन हजार अंकको प्रतिरोध पार गर्न नसकेको रुपमा विश्लेषण गर्दै आएका थिए । यद्यपि मंगलबार भने नेप्सेले २ अंकले मात्र भएपनि तीनहजार भन्दा माथी उक्लेर बन्द भएको छ । यसलाई लगानीकर्ताले अब बजारले तीन हजारको प्रतिरोध पार गरेको रुपमा विश्लेषण गरेका छन् ।
नेप्सेका अनुसार मंगलबार १७६ कम्पनीको सेयर मूल्य बढ्यो भने ७४ कम्पनीको मूल्य घट्यो । कुल १ लाख ५७ हजार ५२५ पटकको किनबेचबाट १८ अर्ब ५२ करोड ९३ लाख रुपैयाँको सेयर कारोबार भएको छ । सोमबारको तुलनामा मंगलबार कारोबार रकम भने घटेको छ । सोमबार १९ अर्ब ३६ करोड रुपैयाँको सेयर कारोबार भएको थियो ।
कुल ४ करोड १८ लाख ८ हजार ९६६ कित्ता सेयर किनबेच भएको नेप्सेले जनाएको छ । विकास बैंक, फाइनान्स र व्यापार उपसमूह घटेका छन् । विकास बैंक २३.७९, फाइनान्स ३.३२ र व्यापार ११.३६ अंकले घटेका हुन् । बाँकी सबै उपसमूह बढेका छन् । बढ्ने उपसमूहमा निर्जीवन बिमा, लघुवित्त, जीवन बिमा, जलविद्युत्, होटल तथा पर्यटन, जलविद्युत्, बैंकिङलगायत उपसमूह रहे ।
निर्जीवन बिमा १५०.१८, लघुवित्त ९४.७८, जीवन बिमा ११२.६०, जलविद्युत् १७.२६, होटल तथा पर्यटन २३.५१, बैंकिङ २०.४० अंकले बढेका छन् । मुक्तिनाथ कृषि कम्पनी, ट्रेड टावर र सान्भी इनर्जीको सेयर मूल्य १० प्रतिशतले बढेपछि सर्किट ब्रेक लाग्यो । नाडेप लघुवित्तको ९.९९ र नेपाल वायरहाउसिङ कम्पनीको ८.०६ प्रतिशतले सेयर मूल्य बढेको छ । समता घरेलु लघुवित्तको ८.६०, विन्दाबासिनी हाइड्रोपावरको २.९३, उन्नति सहकार्य लघुवित्तको २.७३, श्वेत गंगा हाइड्रोपावरको २.६४ र मन्दाकिनी हाइड्रोपावरको २.४८ प्रतिशतले सेयर मूल्य घटेको छ ।
कारोबार रकमका आधारमा हिमालयन डिस्टिलरी, ग्रिन भेञ्चर्स, नेपाल रिइन्स्योरेन्स कम्पनी, हिमालयन रिइन्स्योरेन्स र राधी विद्युत् कम्पनी अगाडि रहे । हिमालयन डिस्टिलरीको ६४ करोड ४१ लाख, ग्रिन भेञ्चर्सको ६३ करोड ८२ लाख, नेपाल रिइन्स्योरेन्स कम्पनीको ५६ करोड ७७ लाख, हिमालयन रिइन्स्योरेन्सको ५२ करोड ७७ लाख र राधी विद्युत् कम्पनीको ४९ करोड ७७ लाख रुपैयाँको सेयर कारोबार भएको छ ।
नेप्से बढ्दा सेयर बजारको आकार (कुल बजार पुँजीकरण) मा ५१ अर्ब ३३ करोड ५९ लाख रुपैयाँले वृद्धि भएको छ । सोमबार ४९ खर्ब ५८ अर्ब १२ करोड ८५ लाख रुपैयाँ रहेको कुल बजार पुँजीकरण मंगलबार ५० खर्ब ९ अर्ब ४६ करोड ४५ लाख कायम भएको छ । यो हालसम्मकै उच्च हो । पछिल्ला केही दिन यता कुल बजार पुँजीकरणले नयाँ रेकर्ड कायम गर्दै आएको छ ।
कुल सूचीकृत सेयर संख्यालाई सोही दिनको सेयर मूल्यले गुणा गरेर कुल बजार पुँजीकरण गणना गरिन्छ । यही ५ साउनमा ४८ खर्ब २६ अर्ब ९९ करोड ८६ लाख रुपैयाँ कायम भई पुँजीकरणले नयाँ रेकर्ड राखेको थियो । यसअघि ३ फागुन २०८१ मा सेयर बजारको आकार ४७ खर्ब ९९ अर्ब रुपैयाँमा पुगेको थियो ।
