काठमाडौँ — सेयर कारोबार मापक नेप्से परिसूचक आइतबार शून्य दशमलव ३२ अंकले बढेको छ । नेप्से बिन्दु २ हजार ८ सय ७० दशमलव ९५ बिन्दुमा उक्लिएको हो । साताको पहिलो कारोबार दिन नेप्से परिसूचक २९ सय बिन्दुमा पुगेर फर्किएको छ ।

आइतबार १ बजेर ५ मिनेट जाँदा नेप्से २९ सय २२ दशमलव ३१ बिन्दुमा पुगे पनि बन्द हुँदा २८ सय ७० दशमलव ९५ बिन्दुमै सीमित भएको छ । 

यसबाट कुल १०६ कम्पनीको सेयर मूल्य बढ्यो भने १४४ कम्पनीको मूल्य घट्यो । कुल १ लाख ७८ हजार १७६ पटकको किनबेचबाट ५ करोड १६ लाख ५८ हजार ३८५ कित्ता सेयर खरिदबिक्री भएको छ । झन्डै एक वर्षयताकै उच्च सेयर कारोबार भएको छ । आइतबार एकै दिन २१ अर्ब ४६ करोड ४९ लाख ९४ हजार रुपैयाँको सेयर कारोबार भयो । जुन २०८१ भदौ २ यताकै उच्च कारोबार रकम हो । यसअघि २८ अर्ब ८३ करोड ६९ लाख रुपैयाँको सेयर बजार भएको छ । 

जीवन बिमा र निर्जीवन बिमामा लगानीकर्ताको आकर्षण रह्यो । नेप्सेका अनुसार जीवन बिमा उपसमूह १९२.२०, निर्जीवन बिमा १७९.५५, होटल तथा पर्यटन ८८.५, अन्य ८३.२१ र सामूहिक लगानी कोष शून्य दशमलव शून्य ५ अंकले बढ्यो बाँकी सबै उपसमूह घट्यो । उत्पादन तथा प्रशोधन सबैभन्दा बढी ८५.५१, फाइनान्स ५९.८५, व्यापार २१.४२, बैंकिङ २१.४१, जलविद्युत् १५.८५ अंकले घट्यो ।