काठमाडौँ — साताको अन्तिम कारोबार दिन सेयर कारोबार मापक नेप्से परिसूचक २५.८९ अंकले बढेको छ । शून्य दशमलव ९५ प्रतिशतले बढेर २ हजार ७ सय ३१ दशमलव ८० बिन्दुमा उक्लिएको हो । कुल १ सय ६१ कम्पनीको सेयर मूल्य बढ्यो भने ८७ कम्पनीको मूल्य घट्यो । 

कुल ८८ हजार ६ सय १५ पटकको किनबेचबाट ९ अर्ब ६८ करोड २४ लाख रुपैयाँको कारोबार भएको छ । बुधबारको तुलनामा बिहीबार कारोबार रकम पनि बढेको छ । बुधबार २२.०४ अंकले नेप्से बढ्दा ७ अर्ब ४५ करोड १८ लाख रुपैयाँको कारोबार भएको थियो । बिहीबार ९ अर्ब ६८ करोड २४ लाख रुपैयाँको सेयर कारोबार भएको छ । 

बिहीबार कुल २ करोड ६४ लाख ७० हजार ८ सय ४० कित्ता सेयर किनबेच भए । यस दिन जलविद्युत् र व्यापारबाहेक बाँकी उपसमूह बढ्यो । जलविद्युत् ७.९२ र व्यापार २२.४८ अंकले घटेको छ । लघुवित्त उपसमूह ७१.२०, विकास बैंक ६२.६२, बैंकिङ ४२.७२, निर्जीवन बिमा ३४.९७ अंकले बढेको छ । माईखोला हाइड्रोपावरको ८.१५, मान्डु हाइड्रोपावरको ६.७६, समता घरेलु लघुवित्तको ६.५७, भगवती हाइड्रो डेभलपमेन्ट कम्पनीको ६.५२ र सानिमा बैंकको ४.८० प्रतिशतले सेयर मूल्य बढ्यो ।