झापा — काँकडभिट्टा नाकाबाट हुने चिया निर्यातमा सुधार भएको छ । मेची भन्सार कार्यालय काँकडभिट्टाबाट चालु आर्थिक वर्षको ११ महिनामा चिया निर्यात ४० दशमलव ५ प्रतिशतले बढेको हो । यस अवधिमा ३ अर्ब ८६ करोड ६४ लाख ७८ हजार रुपैयाँको चिया निर्यात भएको कार्यालयको तथ्यांक छ ।

गत आर्थिक वर्ष २०८०/८१ को यही अवधिमा २ अर्ब ७५ करोड २८ लाख ३२ हजार रुपैयाँको चिया निर्यात भएको थियो ।

निर्यात हुने प्रमुख वस्तुका रूपमा रहेको अलैंची निर्यात भने घटेको छ । चालु आर्थिक वर्षको ११ महिनामा ७ अर्ब १८ करोड १० लाख ७३ हजार रुपैयाँको अलैंची निर्यात भएको छ । गत आर्थिक वर्षको यही अवधिमा ७ अर्ब ४६ करोड ६८ लाख ७६ हजारको अलैंची निर्यात भएको थियो ।

भन्सारले चालु आर्थिक वर्षको ११ महिनामा १४ अर्ब ४३ करोड ९२ लाख ३७ हजार राजस्व उठाएको छ । कार्यालयले गत साउनदेखि जेठसम्म लक्ष्यको ९१ दशमलव ५६ प्रतिशत राजस्व संकलन गरेको हो । यस अवधिमा कार्यालयले १५ अर्ब ७७ करोड १९ लाख ४६ हजार राजस्व संकलन गर्ने लक्ष्य लिएको थियो ।

गत आर्थिक वर्षको यही अवधिको तुलनामा भने चालु आर्थिक वर्षमा राजस्व संकलन १४ प्रतिशतले बढेको कार्यालयले जनाएको छ । गत आर्थिक वर्ष २०८०/०८१ को ११ महिनामा कार्यालयले ७७ दशमलव ५६ प्रतिशत राजस्व संकलन गरेको थियो । २०७९/८० को यही अवधिमा भने ६९ दशमलव ९४ प्रतिशत राजस्व संकलन गरेको थियो ।

अर्थ मन्त्रालयले मेची भन्सार कार्यालय काँकडभिट्टालाई राजस्व असुलीको वार्षिक लक्ष्य १७ अर्ब ३४ करोड ४६ लाख ३७ हजार रुपैयाँ दिएको छ । कार्यालयलाई वार्षिक लक्ष्य पूरा गर्न असारमा मात्रै २ अर्ब ९ करोड ५४ लाख रुपैयाँ संकलन गर्नुपर्ने दबाब छ।

मेची भन्सार कार्यालयले गत आर्थिक वर्षमा पनि राजस्व संकलनको वार्षिक लक्ष्य भेटाउन सकेको थिएन । आर्थिक वर्ष २०८०/८१ मा १८ अर्ब २५ करोड ७८ लाख ६८ हजार रुपैयाँ राजस्व संकलन गर्ने लक्ष्य थियो । तर, लक्ष्यको ७८ दशमलव ४० प्रतिशत अर्थात् १४ अब २३ करोड ५२ लाख ६० हजार रुपैयाँ मात्रै संकलन गर्न भन्सार कार्यालय सफल भयो । यस वर्ष पनि सोही अवस्था दोहोरिन सक्ने भन्सार अधिकारी बताउँछन् ।