काठमाडौँ — बैंक तथा वित्तीय संस्थामा रहेको कुल निक्षेप ७० खर्ब रुपैयाँ नाघेको छ । यो हालसम्मकै धेरै हो । बैंक तथा वित्तीय संस्थामा रहेको कुल निक्षेपमध्ये वाणिज्य बैंकहरुमा मात्र ६२ खर्ब ६२ अर्ब रुपैयाँ छ । बाँकी करिब साढे ७ खर्ब निक्षेप विकास बैक र फाइनान्स कम्पनीमा रहेको राष्ट्र बैंकले जनाएको छ ।

उल्लेखित ७० खर्ब निक्षेप वाणिज्य बैंक, विकास बैंक र फाइनान्स कम्पनीको मात्र हो । यसबाहेक सदस्य बचतका रुपमा लघुवित्त वित्तीय संस्था र सहकारी संघसंस्थाले पनि निक्षेप संकलन गर्छन । तर, ती संघ संस्थामा रहेको निक्षेप राष्ट्र बैंकले संकलन गर्ने तथ्यांकमा समावेश हुँदैन । यसकारण अर्थतन्त्रका सबै क्षेत्रको निक्षेप जोड्दा वास्तविक निक्षेप अझै धेरै हुने जानकारहरु बताउँछन् ।