काठमाडौँ — आइतबार र सोमबार नेप्से परिसूचक सामान्य अंकले सकारात्मक भएर बन्द भए पनि यो सुधार मंगलबारसम्म पनि टिकेन । जसअनुसार ३.९० अंकले घट्दा मंगलबार समग्र नेप्से २ हजार ६ सय ५४.७५ अंकमा ओर्लेको छ । अघिल्ला दुई कारोबार दिन नेप्से सामान्य अंकले बढे पनि कारोबार रकममा भने उल्लेख्य सुधार देखिएको थियो । मंगलबार नेप्सेसँगै कारोबार रकम पनि घटेको छ ।

सो दिन समग्र नेप्से करिब चार अंकले घट्दा होटल तथा पर्यटन क्षेत्र र बिमा उपसमूहको परिसूचकमा उच्च अंकको गिरावट आएको छ । सो दिन कारोबारमा आएका १३ उपसमूहमध्ये १० वटाको परिसूचक घटे भने जलविद्युत्, लघुवित्त र व्यापारको बढे । घट्ने उपसमूहमध्ये होटल, बिमा र बैंकिङ उपसमूहको परिसूचक धेरैले घटेपछि नेप्सेको वृद्धिमा धक्का पुग्को हो । सो दिन होटल तथा पर्यटन क्षेत्र ११४.०१ अंकले घट्दा लघुवित्त ५१.७७ अंकले बढेको छ ।

कुल ९९ कम्पनीको सेयर मूल्य बढ्यो भने १ सय ४८ कम्पनीको मूल्य घट्यो । कुल ७० हजार ७७ पटकको किनबेचबाट १ करोड ६४ लाख ७ सय ७५ कित्ता सेयर किनबेच भयो । 

सोमबारको तुलनामा मंगलबार सेयर कारोबार रकम पनि घटेको छ । सोमबार १३ अर्ब १८ करोड रुपैयाँ सेयर कारोबार भएकामा मंगलबार कारोबार रकम ७ अर्ब ६५ करोड ३२ लाख रुपैयाँमा सीमित भएको छ । 

सो दिन जलविद्युत् उपसमूहको परिसूचक ९.८५ अंकले बढ्यो । यही कारण धेरै कमाउने र उच्च कारोबार गर्ने कम्पनीको सूचीमा सोही क्षेत्रको वर्चस्व छ । जसअनुसार पियोर इनर्जीको ९.९९, बुटवल पावर कम्पनीको ७.२३, माथिल्लो हेवाखोलाको ५.२८, विन्दाबासिनी हाइड्रोपावरको ५.१६ र सामुदायिक लघुवित्तको ७.१३ प्रतिशतले सेयर मूल्य बढ्दा ती कम्पनीका लगानीकर्ताले सबैभन्दा धेरै कमाए । तर, गार्डियन माइक्रो लाइफ इन्स्योरेन्सको ४.६२, नारायणी विकास बैंकको ३.९४, सिन्धु विकास बैंकको ३.७७, क्रेस्ट माइक्रो लाइफ इन्स्योरेन्सको ३.२१ र ओरियन्टल होटल्सको २.८७ प्रतिशतले सेयर मूल्य घट्दा यी कम्पनीका लगानीकर्ताले सबैभन्दा धेरै गुमाए ।