पर्सा — वीरगन्ज नाकाबाट तेस्रो मुलुक तर्फ छुर्पीको निर्यात उत्साहजनक रूपमा बढेको छ । नेपाली छुर्पीले केही वर्षयता युरोप तथा अमेरिकामा बजार लिन थालेको हो । विशेषगरी अमेरिका, अस्ट्रेलिया, क्यानडालगायत मुलुकमा नेपाली छुर्पीको माग बढेको छ ।

वीरगन्ज भन्सार कार्यकालको तथ्यांक अनुसार चालु आर्थिक वर्षको वैशाखसम्म यो नाकाबाट ८८ करोड रुपैयाँ बराबरको ४ लाख ९५ हजार ६ सय ८६ किलो छुर्पी निकासी भएको छ । गत आर्थिक वर्षको यो अवधिमा ५३ करोड बराबरको २ लाख ९४ हजार २ सय १५ किलो छुर्पी निकासी भएको थियो ।

तेस्रो मुलुकका घरपालुवा कुकुर, बिरालोले नेपाली छुर्पीको स्वाद रुचाएपछि नेपाली छुर्पीको माग बढ्दै गएको हो । भन्सार बिन्दुबाट यो बस्तु ‘कुकुर वा बिरालोको खाना’ शीर्षकमा निकासी हुन्छ । निकासीको बढ्दो दरले नेपाली छुर्पीको अन्तर्राष्ट्रिय बजारमा प्रवर्द्धन गर्न सके यसले थप बजार पाउने सम्भावना बढी छ ।

वीरगन्ज भन्सार कार्यालयका सूचना अधिकारी अमित तिवारी यस वर्ष तुलनात्मक रूपमा वीरगन्ज नाकाबाट छुर्पीको निकासी बढेको बताउँछन् । कुकुर, बिरालो पालकले नेपाली छुर्पीलाई मासुको विकल्पको रूपमा प्रयोग गरिरहेको उनले बताए ।