पर्सा — संघीय सरकारले बिहीबार २०८२/०८३ को बजेट सार्वजनिक गर्नुअघि सवारीसाधन र मदिरा आयात हुने मुलुककै प्रमुख नाका वीरगन्जबाट उल्लेख्य परिमाणमा यी दुवै वस्तु आयात भएका छन् । 

वीरगन्ज भन्सार नाकाबाट नयाँ सवारीसाधन र सिर्सिया सुक्खा बन्दरगाह नाकाबाट तयारी मदिराको आयात धेरै भएको हो । बजेटबाट सरकारले दुवै वस्तुको आयातमा भन्सार शुल्क तथा अन्तःशुल्क वृद्धि गर्ने पूर्वानुमान गरी आयातकर्ताले यसो गरेका हुन् । जेठ १ देखि १४ गते बुधबारसम्म वीरगन्ज भन्सार नाकाबाट १ सय ५४ बस ट्रकका चेसिस, विद्युतीय कार/जिप र इन्धनबाट चल्ने जिप, कार, भ्यान आयात भएका छन् । 

बुधबार एक दिन मात्रै ३२ वटा यस्ता सवारीसाधन जाँच पास भएको वीरगन्ज भन्सार कार्यालयका प्रमुख भन्सार अधिकृत राजेन्द्र ढुंगानाले बताए । सामान्य दिनमा ६/७ वटा मात्र नयाँ सवारी साधन जाँचपास हुने गरेकोमा जेठ लागेदेखि नै यो क्रम बढेको उनले बताए । ‘प्रायः संघीय सरकारको बजेट आउनुअघि यो प्रवृत्ति बर्सेनि दोहोरिन्छ,’ उनले भने, ‘यस वर्ष पनि त्यसकै पुनरावृत्ति भएको हो ।’ 

वीरगन्ज भन्सारले संकलन गर्ने राजश्वमा सवारीसाधन आयातबाट संकलन हुने राजश्वको मुख्य भूमिका हुने गरेको छ । सवारीसाधनको आयात बढेपछि जेठमा राजश्व असुलीमा पनि केही सुधार आउने उनले बताए । भारतमा निर्मित तथा तेस्रो मुलुकबाट समेत आयात हुने सवारी साधन भित्रिने मुलुककै मुख्य नाका वीरगन्ज नाका हो । भौगोलिक रूपले कोलकाता बन्दरगाहबाट नजिक रहेको तथा वीरगन्जको राजधानी काठमाडौँसँगको छोटो दुरीको कारणले पनि यो नाका हुँदै सवारीसाधन आयात गर्न रुचाउँछन् ।