काठमाडौँ — साप्ताहिक कारोबारमा नेप्से परिसूचक करिब ७७ अंकले बढेको छ । अघिल्लो बिहीबारको तुलनामा गत बिहीबार नेप्से परिसूचक करिब ७६.७ अंकले बढेको हो ।

यो साताको पाँच कारोबार दिनमा तीन दिन नेप्से बढ्यो भने दुई दिन घट्यो । तीन दिनमा ८७.४३ अंकले बढेको नेप्से दुई दिनमा १०.७३ अंकले घटेको थियो । जसअनुसार अघिल्लो बिहीबार २ हजार ६ सय ११.८५ अंकमा रहेको नेप्से गत बिहीबार २ हजार ६ सय ८८.५५ बिन्दुमा बन्द भएको हो । अघिल्ला साताहरूमा खासै बढ्न नसकेको नेप्से गत साता ७७ अंकले वृद्धि भएको हो । 

गत साता सेयर बजारमा ४३ अर्ब ७० करोड १५ लाख रुपैयाँ बराबरको सेयर कारोबार भएको छ । सो अवधिमा भएको कुल कारोबारमध्ये सबैभन्दा धेरै १८ अर्ब ५३ करोड (४२.४० प्रतिशत) रुपैयाँको जलविद्युत् उपसमूहका कम्पनीको मात्र भएको छ । कुल साप्ताहिक कारोबारमध्ये ८.३४ प्रतिशत बैकिङ, ९.४७ प्रतिशत अन्य, ७.२४ प्रतिशत विकास बैंक, ७.०९ प्रतिशत लगानी, ५.२१ प्रतिशत जीवन बिमा र ४.४५ प्रतिशत लघुवित्त उपसमूहको हिस्सा छ । 

गत साता ३ लाख ९९ हजार ४० वटा कारोबारबाट ९ करोड ५४ लाख २४ हजार ३२८ कित्ता सेयर किनबेच भए । सबैभन्दा बढी जलविद्युत् उपसमूहअन्तर्गतका कम्पनीको ४ करोड ५७ लाख ३ हजार ६ सय २० कित्ता सेयर किनबेच भएको थियो । 

नेप्से परिसूचक बढेसँगै गत साता लगानीकर्ताको सम्पत्तिको मूल्य पनि करिब सवा एक खर्ब रुपैयाँ बढेको छ । उक्त अवधिमा सेयर बजारको आकार (कुल बजार पुँजीकरण) पनि १ खर्ब २९ अर्बले बढेकाले लगानीकर्ताको सम्पत्तिको मूल्य पनि बढेका रूपमा विश्लेषण गरिएको हो । अघिल्लो बिहीबार ४३ खर्ब ४४ अर्ब रुपैयाँ रहेको कुल बजार पुँजीकरण गत बिहीबार ४४ खर्ब ७३ अर्ब रुपैयाँ कायम भएको छ । बजार पुँजीकरणको हिसाबले बैंक तथा वित्तीय संस्था र बिमा कम्पनीको हिस्सा ५२.७ प्रतिशत छ । जलविद्युत् उपसमूहको हिस्सा १५.१, लगानीको ७.९, व्यापारको ५.८, उत्पादन तथा प्रशोधनको ५.४, होटलको २.६ र अन्य उपसमूहको हिस्सा १०.५ प्रतिशत छ । 

हाल नेपाल स्टक एक्सचेन्जमा सूचीकृत कम्पनीको संख्या २ सय ७० छ । तीमध्ये १ सय ३२ बैंक तथा वित्तीय संस्था र बिमा कम्पनी छन् । ९१ जलविद्युत्, २२ उत्पादन तथा प्रशोधन उद्योग, ७ होटल, ७ लगानी, ४ व्यापार र ७ अन्य उपसमूहका छन् । २०८० चैतसम्म नेप्सेमा सूचीकृत कम्पनी संख्या २ सय ७२ थियो । हालसम्म नेप्सेमा सूचीकृत ८ अर्ब ७२ करोड धितोपत्रको चुक्ता मूल्य ८ खर्ब ५९ अर्ब ४५ करोड रुपैयाँ छ ।