काठमाडौँ — नेकपा (माओवादी केन्द्र) का सांसद माधव सापकोटाले विद्युत् प्राधिकरणको नाफा–घाटा प्रकरणबारे तीन वटै पक्षलाई झिकाएर छलफल गर्न माग गरेका छन् ।
बुधबार बसेको पूर्वाधार विकास समितिको बैठकमा बोल्दै सांसद सापकोटाले कुलमान घिसिङ विद्युत् प्राधिकरणको कार्यकारी निर्देशक हुँदा गरिएको अडिट र हाल हितेन्द्रदेव शाक्य कार्यकारी निर्देशक बनेपछि गरिएको अर्को अडिटको विषयमा स्पष्टता आवश्यक रहेको बताए ।
उनले समितिमा विद्युत् प्राधिकरणका वर्तमान कार्यकारी निर्देशक, पूर्व कार्यकारी निर्देशक कुलमान घिसिङ र महालेखा परीक्षकलाई उपस्थित गराई छलफल गर्नुपर्ने माग राखेका थिए ।
उनका अनुसार प्रतिपक्षले कुलमानको बचाउ गर्ने र सत्तापक्षले खेदो खन्ने कार्यको अन्त्य गर्दै सत्यतथ्यमा आधारित निष्कर्ष निकाल्न छलफल आवश्यक छ । यदि कुलमान दोषी ठहरिए कानुनअनुसार कारबाही हुनुपर्ने धारणा उनले व्यक्त गरे ।
उनले भने, 'हिजो कुलमानज्यू हुँदा अडिट प्रणाली फरक थियो, अहिले अर्को अडिट प्रणाली लागू गरिएको देखिन्छ । यही कुरा त स्पष्ट पार्नुपर्छ । विद्युत् प्राधिकरणका बहालवाला एमडी, कुलमानज्यू र आवश्यक परे महालेखा परीक्षकलाई पनि झिकाएर छलफल गर्नुपर्छ । सबैभन्दा पहिले पारदर्शी ढंगले बुझ्न जरुरी छ । हामी प्रतिपक्षको रक्षा गर्ने र सत्तापक्षले खेदो खन्ने काम बन्द गरौँ । विलम्ब नगरी सबैको भनाइ सुनेर निष्कर्षमा पुगौँ । यदि कुलमानज्यूबाट गल्ती भएको हो भने नेपालको कानून अनुसार कसैलाई उन्मुक्ति दिने कुरा हुँदैन ।'
उनले राम्रो कामलाई राम्रो भन्न र गल्ती भए गल्ती स्वीकार गर्नुपर्ने धारणा पनि व्यक्त गरेका थिए ।
