काठमाडौँ — सेयर कारोबार मापक नेप्से परिसूचक मंगलबार १४.८७ अंकले घटेको छ । नेप्से शून्य दशमलव ५६ प्रतिशतले घटेर २ हजार ६ सय ३४.२३ विन्दुमा ओर्लिएको हो । लगातार तेस्रो कारोबार दिन नेप्से परिसूचक घटेको छ । नेप्से गत बिहीबार १२.०४ र आइतबार १२.५३ अंकले घटेको थियो । 

मंगलबार ७७ कम्पनीको सेयर मूल्य बढ्यो भने १६८ कम्पनीको घट्यो । एक कम्पनीको मूल्य स्थिर रह्यो । कुल १ लाख २ हजार ४४५ पटकको सेयर किनबेचबाट ९ अर्ब ६३ करोड ४८ लाख रुपैयाँ कारोबार भएको छ । २ करोड १८ लाख २८ हजार २३१ कित्ता सेयर खरिदबिक्री भयो । विकास बैंक, जीवन बिमा, उत्पादन तथा प्रशोधनबाहेक सबै उपसमूहहरू घटे । विकास बैंक ४७.३४, जीवन बिमा १२७.३८, उत्पादन तथा प्रशोधन २४.८४ अंकले बढेको छ । घट्ने उपसमूहमा होटल तथा पर्यटन, लघुवित्त, निर्जीवन बिमा र व्यापारलगायत रहे । 

क्रेस्ट माइक्रो लाइफ इन्स्योरेन्स र ओम मेगाश्री फार्मासिटिकल्सको सेयर मूल्य १० प्रतिशतले सर्किट ब्रेक लाग्यो । जोशी हाइड्रोपावर डेभलपमेन्ट कम्पनी, उन्नति सहकार्य लघुवित्तको ५.४४ र लुम्बिनी विकास बैंकको ४.२२ प्रतिशतले सेयर मूल्य बढ्यो । नेपाल माइक्रो इन्स्योरेन्स कम्पनीको ६.२२, बुटवल पावर कम्पनीको ४.३१, सिक्लेस हाइड्रोपावरको ४.२७, हिमालय ऊर्जा विकास कम्पनीको ४ र राप्ती हाइड्रो एन्ड जनरल कन्स्ट्रक्सनको ३.९९ प्रतिशतले सेयर मूल्य घट्यो । 

सेयर बजारको आकार (कुल बजार पुँजीकरण) मा संकुचन आएको छ । तीन कारोबार दिनमा कुल बजार पुँजीकरण ६५ अर्ब ६२ करोड घटेको छ । गत बुधबार ४४ खर्ब ४७ अर्ब ५७ करोड रुपैयाँ रहेको कुल बजार पुँजीकरण मंगलबार ४३ खर्ब ८१ अर्ब ९४ करोड रुपैयाँ कायम भएको छ । यसले तीन कारोबार दिनमा लगानीकर्ताको सम्पत्तिको मूल्य साढे ६५ अर्ब रुपैयाँले घटेको देखिन्छ । कुल सूचीकृत सेयरलाई सोही दिनको सेयर मूल्यले गुणा गरेर कुल बजार पुँजीकरण गणना गरिन्छ । यसकारण पुँजीकरण घट्नुको अर्थ सूचीकृत सेयरको मूल्यमा कमी आउनु हो । यही आधारमा लगानीकर्ताको सम्पत्तिको मूल्य घटेको रूपमा विश्लेषण गरिन्छ ।