काठमाडौँ — साप्ताहिक कारोबारको पहिलो दिन आइतबार नेप्से परिसूचक १२.५३ अंकले घटेको छ । अघिल्लो दिनको तुलनामा शून्य दशमलव ४७ प्रतिशतले घटेपछि समग्र नेप्से २ हजार ६ सय ४९.११ बिन्दुमा ओर्लिएको छ । गत बिहीबार घटेर बन्द भएको नेप्सेले आइतबार पनि सोही प्रवृत्ति पछ्याएको हो ।

आइतबार कारोबारमा आएकामध्ये ८२ कम्पनीको सेयर मूल्य बढ्यो भने १६४ वटाको घट्यो । आइतबार ८८ हजार ९ सय ५५ पटकको सेयर कारोबारमा २ करोड ४० लाख ११ हजार १४ कित्ता सेयर किनबेच भए । ती किनबेचमा १० अर्ब २० करोड २७ लाख रुपैयाँ बराबरको कारोबार भएको छ । गत बिहीबारको तुलनामा आइतबार कारोबार रकम घटेको छ । गत बिहीबार ११ अर्ब ६५ करोड रुपैयाँ बराबरको सेयर कारोबार भएको थियो ।

कारोबारमा आएका कुल १३ उपसमूहमध्ये विकास बैंक, होटल तथा पर्यटन, जीवन बिमा, निर्जीवन बिमा र व्यापारको परिसूचक बढे । जसअनुसार होटल तथा पर्यटन उपसमूहको परिसूचक ४००.८१, विकास बैंकको ५९.३८, जीवन बिमाको १५.०७ र व्यापारको १६.३० अंकले बढे । तर, बैंकिङ, वित्त कम्पनी, जलविद्युत्, इन्भेस्टमेन्ट, उत्पादन तथा प्रशोधन, लघुवित्त, सामूहिक लगानी कोष, निर्जीवन बिमा र अन्य उपसमूहको परिसूचक घटे । जसअनुसार वित्त कम्पनी उपसमूहको परिसूचक ८६.२३, जलविद्युत्को ४८.९३ र उत्पादन तथा प्रशोधनको ३३ अंकले घटेको नेप्सेले जनाएको छ ।

नेपाल माइक्रो इन्स्योरेन्स कम्पनी र क्रेस्ट माइक्रो लाइफ इन्स्योरेन्सको मूल्य १० प्रतिशतले बढ्दा सर्किट ब्रेकरमार्फत कारोबार नियन्त्रण गर्नुपरेको थियो । सो दिन हिमालयन हाइड्रोपावरको सेयर मूल्य ९.९९, जोशी हाइड्रोपावर डेभलपमेन्ट कम्पनीको ९.९९ र ओम मेगाश्री फर्मासिटिकल्सको ९.९८ प्रतिशतले बढ्यो । तर, सिन्धु विकास बैंकको सेयर मूल्य ७.३०, सिनर्जी पावर डेभलपमेन्टको ४.९३, ग्रिनलाइफ हाइड्रोपावरको ४.५२, गुह्येश्वरी मर्चेन्ट बैंक एन्ड फाइनान्सको ४.३३ र सप्तकोशी विकास बैंकको ४.१३ प्रतिशतले घटेको नेप्सेले जनाएको छ ।