काठमाडौँ — सेयर कारोबार मापक नेप्से परिसूचक १२‍‍‍.०४ अंकले घटेको छ । अघिल्ला दुई कारोबार दिन लगातार बढेको नेप्से बिहीबार घटेको हो । यो साता आइतबार र सोमबार घटेको नेप्से गत मंगलबार १‍.०३ र बुधबार ६२.२५ अंकले बढेको थियो । त्यसअघि पाँच कारोबार दिन नेप्से निरन्तर घटेको थियो ।

बुधबारको तुलनामा बिहीबार शून्य दशमलव ४५ प्रतिशतले घटेर नेप्से २ हजार ६ सय ६१ दशमलव ६४ बिन्दुमा ओर्लिएको हो । सो दिन कारोबारमा आएका कुल १३ उपसमूहमध्ये फाइनान्स, जलविद्युत्, जीवन बिमा, उत्पादन तथा प्रशोधन र सामूहिक लगानी कोषको सेयर मूल्य बढ्यो ।

यस्तै फाइनान्स कम्पनी उपसमूहको परिसूचक १०४.९३, जलविद्युत्को १.१७, जीवन बिमाको १.७०, उत्पादन तथा प्रशोधनको १२.३० र सामूहिक लगानी कोषको शून्य दशमलव शून्य एक अंकले बढेको छ । घट्ने उपसमूहहरूमा व्यापार, निर्जीवन बिमा, लघुवित्त, होटल तथा पर्यटन, विकास बैंक, बैंकिङलगायत रहे । 

कुल ९६ कम्पनीको सेयर मूल्य बढ्यो भने १५० कम्पनीको मूल्य घट्यो । कुल ३ करोड ७ लाख ९९ हजार ९१ कित्ता सेयर किनबेच भए । साताको अन्तिम कारोबार दिन १ लाख ३ हजार ३ सय १९ पटकको सेयर किनबेचबाट ११ अर्ब ६५ करोड रुपैयाँको सेयर कारोबार भएको छ ।

कारोबार रकम २०८१ फागुन २१ यताकै उच्च हो । २०८१ फागुन २० मा १२ अर्ब ९४ करोड ६४ लाख रुपैयाँको सेयर कारोबार भएको थियो । त्यसपछि चैत ३ मा १० अर्ब ७९ करोड ७३ लाख रुपैयाँ र चैत १४ मा १० अर्ब ८७ करोड ५९ लाख रुपैयाँको कारोबार भएको थियो । बुधबार १० अर्ब ५१ करोड ८४ लाख रुपैयाँ कारोबार भएकामा बिहीबार ११ अर्ब ६५ करोड रुपैयाँको कारोबार भएको थियो ।