विराटनगर — कुनै बेला देशकै राजनीतिक केन्द्र मानिने औद्योगिक राजधानी विराटनगर अहिले भव्य तयारीमा व्यस्त छ । वैशाख १८ र १९ मा यो सीमान्त सहर कोशीको पहिलो लगानी सम्मेलनको ऐतिहासिक साक्षी बन्ने तयारीमा छ । 

प्रदेश सरकारले १० करोडभन्दा माथिका ७१ परियोजना सोकेस गर्दै एक खर्ब ७३ अर्ब ४९ करोड रुपैयाँको लगानी भित्र्याउने लक्ष्य लिएको छ ।

पर्यटन, भौतिक पूर्वाधार, कृषि, उद्योग, ऊर्जा, सूचना प्रविधि र फोहोर व्यवस्थापनलगायत विविध क्षेत्रमा निजी तथा वैदेशिक लगानी भित्र्याउने उद्देश्यसहित आयोजना हुन लागेको सम्मेलन प्रदेशको आर्थिक सम्भावना र पूर्वाधार विकासका लागि ‘गेम चेन्जर’ हुने दाबी गरिएको छ । प्रधानमन्त्री केपी शर्मा ओलीले सम्मेलनको उद्घाटन गर्दै छन् । 

‘अब प्रदेश आफैं समृद्धिको बाटो पहिल्याउँछ’ भन्ने नारा रहेको सम्मेलनले प्रदेशस्तरको दीर्घकालीन विकास योजनामा नयाँ मोड ल्याउने सरकारको विश्वास छ । ‘२० भन्दा बढी देशका लगानीकर्ता, एनआरएनए प्रतिनिधि तथा निजी क्षेत्रका प्रतिष्ठित व्यवसायी विराटनगर आउँदै छन्,’ कोशी प्रदेश लगानी प्राधिकरणका प्रमुख कार्यकारी निर्देशक सरोज कोइरालाले बुधबार पत्रकार सम्मेलनमा भने । सम्मेलनमा लगानीको ढाँचा, परियोजनाको सम्भाव्यता र प्रदेश सरकारको भूमिकाबारे विस्तृत छलफल हुने उनको भनाइ छ । 

सम्मेलनमार्फत प्रदेशले लगानी मात्रै नभित्र्याएर रोजगारी पनि सिर्जना गर्ने आन्तरिक मामिला तथा योजनामन्त्री रामबहादुर मगरले बताए । औद्योगिक विस्तार र दिगो आर्थिक विकासतर्फ स्पष्ट खाका कोर्ने उनले जनाए । कोशी प्रदेश प्राकृतिक स्रोत, कृषि उत्पादन र पर्यटन सम्भावनाले भरिपूर्ण मानिन्छ । तर लामो समयदेखि संरचनागत लगानीको अभावले समृद्धिको गन्तव्य ओझेलमा परेको सरोकारवाला बताउँछन् । सम्मेलन त्यस अभावलाई सम्बोधन गर्दै ‘स्थानीय अवसरलाई वैश्विक लगानीसँग जोड्ने कडी’ बन्ने सरकारको अपेक्षा छ ।

सत्तापक्ष मात्र होइन, प्रमुख प्रतिपक्षी दल नेकपा माओवादी केन्द्रले पनि सम्मेलनको लक्ष्य र उद्देश्यप्रति समर्थन जनाएको छ । ‘लगानी भित्र्याउने कुरामा सरकारले सहयोग मागे पनि, नमागे पनि हाम्रो साथ र समर्थन रहनेछ,’ माओवादी संसदीय दलका नेता इन्द्रबहादुर आङ्वोले भने ।