कास्की — प्रत्येक वर्ष नीति तथा कार्यक्रम र बजेटमा प्राथमिकतामा रहँदै आएको गण्डकी प्रदेशसभा भवन निर्माणको काम अन्ततः ७ वर्षपछि अगाडि बढेको छ । २५ करोड रुपैयाँ खर्च गरेर पोखरा–३ नदीपुरस्थित हालकै भवन पछाडिपट्टि ७ रोपनी क्षेत्रफलमा नयाँ भवन बनाउन लागिएको हो ।

नगर विकास प्रशिक्षण केन्द्रको स्वामित्वमा प्रदेश सरकारसँग भोगाधिकार भएको १ सय १० रोपनीमध्ये ७ रोपनीमा नयाँ भवन बन्ने सहरी विकास तथा भवन कार्यालय कास्की प्रमुख सीडीई ओमराज ढुंगानाले जनाए । 

कार्यालयले श्रेष्ठ एन्ड सन्स–इस्ट वेस्ट जेभी, नयाँ बानेश्वर काठमाडौंसँग भ्याटसहित २५ करोड ३७ लाख ८२ हजार ८ सय ६० रुपैयाँमा माघ १८ मा निर्माण सम्झौता गरिसकेको छ । ३६ महिना (३ वर्ष) भित्र निर्माण कार्य सक्नुपर्ने गरी निर्माण व्यवसायीसँग सम्झौता गरिएको प्रमुख ढुंगानाले बताए । 

सम्झौताअनुसार २०८४ माघ १८ सम्म संसद् भवन बनाइसक्नुपर्नेछ । निर्माणको जिम्मा पाएको कम्पनीले गत सातादेखि निर्माणस्थल सफाइको काम थालेको छ । निर्माण व्यवसायीले २ करोड २१ लाख ९० हजार रुपैयाँ मोबिलाइजेसन रकम लगिसकेको उनले जनाए । निर्माणस्थलमा रहेको एउटा टहरा भत्काएपछि भवनको शिलान्यास गर्ने तयारी छ । सहरी विकास तथा भवन कार्यालय कास्कीअन्तर्गत सरकारले चालु आर्थिक वर्षमा प्रदेशसभा भवन निर्माणका लागि ९ करोड रुपैयाँ बजेट विनियोजन गरेको थियो ।

तीनतले भवनको भुइँतलामा ५ वटा संसदीय दलको बैठक कक्ष र ५ वटा भीआईपी कार्यालय बनाइनेछ । मुख्यमन्त्री, सभामुख, उपसभामुख, विपक्षी दलका नेता र संसद् सचिवालय सचिवको कार्यालय भुइँतलामा रहनेछ । पहिलो तलामा संसद् बैठक कक्ष रहनेछ । त्यहाँ ७८ जना अट्ने गरी चेम्बर बन्नेछ । साथै पिजन होल, सामान्य र भीआईपी कक्ष, मार्सल अफिस, कार्य व्यवस्था परामर्श समितिको बैठक कक्ष, लाइब्रेरी, भिडियो कन्फेरेन्स र टीभी स्टुडियो सोही तलामा रहनेछन् । दोस्रो तलामा ८० जना क्षमताको दर्शकदीर्घा, बहुउद्देश्यीय बैठक कक्ष, स्टोर र बार्दली रहनेछ । तेस्रो तलामा के–के राख्ने भन्ने तय भएको छैन । भवनमा दुई वटा लिफ्ट पनि हुनेछ । भवन बाहिरपट्टि चमेनागृह, पार्किङ बनाइनेछ ।