काठमाडौँ — सेयर कारोबार मापक नेप्से परिसूचक मंगलबार ९.९६ अंकले घटेको छ । अघिल्लो दिनको तुलनामा ०.३६ प्रतिशतले घटेर समग्र नेप्से २ हजार ६ सय ८८.३२ बिन्दुमा ओर्लेको छ । आइतबार र सोमबार पनि घटेको नेप्सेले मंगलबार पनि सोही प्रवृत्ति पछ्याएको हो ।

केही सातायताको राजनीतिक उतारचढाव, गभर्नर नियुक्तिमा सत्ताधारी दल कांग्रेस र एमालेबीच रस्साकसी, दुई सातायताको शिक्षकहरूको काठमाडौंकेन्द्रित आन्दोलन र त्यसले सिर्जना गरेको यातायातमा असहजतालगायत कारण लगानी वातावरण झनै बिग्रिएको भन्दै लगानीकर्ताले थप लगानी गर्न चाहेका छैनन् । 

तेस्रो त्रैमासमा बैंकहरूको वित्तीय विवरण पनि सन्तोषजनक छैन । धेरै बैंकको नाफा घटेको छ, यसको असर वितरणयोग्य नाफामा परेको छ । बैंक तथा वित्तीय संस्थाको खराब कर्जा बढेकाले धेरै बैंकहरूले खराब कर्जाबापतको नोक्सानी व्यवस्था पनि बढाएका छन् । कर्जा असुलीमा समस्या भए पनि बैंक तथा वित्तीय संस्थाको खुद ब्याज आय पनि घटेको छ ।