पर्सा — साल्ट ट्रेडिङ कर्पोरेसन लिमिटेडले ग्लोबल टेन्डरबाट आयात गर्न लागेको युरिया मल कोलकाता बन्दरगाह आइपुगेको छ । कर्पोरेसन प्रादेशिक कार्यालय वीरगन्जका सूचना अधिकृत सन्जयकुमार गुप्ताका अनुसार, सन इन्टरनेसनल कम्पनी आपूर्तिकर्ता रहेको यो कन्साइन्मेन्टको २५ हजार टन युरिया मल बोकेको पानी जहाज शनिबार कोलकाता बन्दरगाह आइपुगेको हो । 

‘आपूर्तिकर्ता कम्पनीबाट प्राप्त सूचनाअनुसार चीनबाट युरिया मल बोकेर पानी जहाज शनिबार कोलकाता बन्दरगाह आइपुगेको छ,’ उनले भने, ‘अब कोलकाता बन्दरगाहमा बोरामा मल प्याकिङ गरेपछि नेपाल तर्फ मल त्यहाबाट परिचालन हुने छ ।’ 

कोलकातामा मल प्याकिङ गरी नेपाल आइपुग्न करिब डेढ साता लाग्ने पनि गुप्ताले बताए । ‘सामान्यतया कोलकाता आइपुगेपछि मल प्याकिङ गरी नेपाल आइपुग्न एकदेखि डेढ साता लाग्छ,’ उनले भने, ‘२५ हजार टनमध्ये वीरगन्ज, विराटनगर र भैरहवा प्रादेशिक कार्यालयले मल पाउनेछन् ।’ भैरहवा र विराटनगरको मल त्यहीँका भारतीय नाकातर्फ जाने छ ।