पर्सा — वीरगन्ज उद्योग वाणिज्य संघले वीरगन्ज–पथलैया औद्योगिक करिडोरमा जारी अघोषित लोडसेडिङ हटाउन माग गरेको छ । नेपाल विद्युत् प्राधिकरणले गरिरहेको अघोषित लोडसेडिङ र बिनासूचना विद्युत् कटौतीप्रति संघले विज्ञप्ति जारी गरेरै चिन्ता जनाएको छ । लोडसेडिङको वैकल्पिक उपाय खोज्न प्राधिकरणसँग संघको माग छ ।

उद्योग प्रतिष्ठानहरूको अक्सिजनका रूपमा रहेको विद्युत्को नियमित आपूर्ति हुन नसकेपछि करिडोरका उद्योग कम क्षमतामा सञ्चालन भइरहेको विज्ञप्तिमा उल्लेख छ । ‘५–६ वर्षअघि प्राधिकरणले घोषणा गरेको लोडसेडिङमुक्त औद्योगिक क्षेत्र तथा उज्यालो नेपालको नाराबाट उद्योगी, व्यवसायी तथा सर्वसाधारण उत्साहित थिए । तर बढ्दो विद्युत् कटौती, गुणस्तरीय विद्युत् आपूर्ति नहुँदा उद्योगहरूका उपकरण र कच्चा पदार्थ बिग्रिनुका साथै उत्पादन प्रक्रियामा समेत नकारात्मक असर परिरहेको छ,’ विज्ञप्तिमा भनिएको छ, ‘पर्सा–बारा औद्योगिक करिडोरका उद्योगले विभिन्न समस्या खेपिरहेकै बखत विद्युत् कटौतीको समस्या झेल्नुपर्दा उद्योगी मर्कामा छन् ।’