काठमाडौँ — सेयर कारोबारको अन्तिम दिन बिहीबार नेप्से परिसूचक ५.५७ अंकले घटेको छ । सेयर कारोबार मापक नेप्से परिसूचक शून्य दशमलव २० प्रतिशतले घटेर २ हजार ६ सय ७०.७० अंकमा ओर्लिएको छ ।

बुधबार नेप्से ९.६६ अंकले बढेर २ हजार ६ सय ७६.२८ अंकमा बन्द भएको छ । तर बिहीबार घटेर २६७०.७० बिन्दुमा पुगेको हो । बिहीबार कारोबारमा आएका मध्ये ११४ कम्पनीको सेयर मूल्य बढ्यो, १३१ कम्पनीको घट्यो भने एक कम्पनीको मूल्य स्थिर रह्यो ।

कुल ४९ हजार ६ सय ३२ पटकको सेयर किनबेचमा ५ अर्ब ६३ करोड ७९ लाख रुपैयाँ बराबरको सेयर कारोबार भएको छ । अघिल्लो दिनको तुलनामा कारोबार रकम बढेको हो । बुधबार ४ अर्ब ४८ करोड ४६ लाख रुपैयाँ बराबरको कारोबार भएको थियो । यसमा कुल १ करोड १३ लाख ८४ हजार ७ सय २५ कित्ता सेयर किनबेच भए । विकास बैंक, जलविद्युत्, लघुवित्त र म्युचअल फन्ड उपसमूहका लगानीकर्ताको मात्रै सम्पत्तिको मूल्य बढ्यो । अन्य लगानीकर्ताको सम्पत्तिको मूल्य घट्यो । उत्पादन तथा प्रशोधन ६२.३३, जीवन बिमा ४३.२८, होटल तथा पर्यटन २६.५१ र निर्जीवन बिमा २४.८२ अंकले घट्यो ।