काठमाडौँ — सरकारले गठन गरेको उच्चस्तरीय आर्थिक सुधार सुझाव आयोगले डिजिटल घुमन्ते (डिजिटल नोम्याड) लाई आकर्षित गर्न नयाँ नीति प्रस्ताव गरेको छ । यसअनुसार डिजिटल घुमन्तेहरूलाई उनीहरूको मासिक आम्दानी १५ सय अमेरिकी डलरभन्दा बढी वा बैंकमा २० हजार अमेरिकी डलरभन्दा बढी मौज्दात भएमा एक पटकमा ५ वर्षको म्याद भएको बहु-प्रवेश भिसा प्रदान गर्न भनिएको छ । 

आयोगले शुक्रबार अर्थ मन्त्रालयलाई बुझाएको प्रतिवदेनमा डिजिटल घुमेन्तेहरूले भिसा पाउन नेपालको अस्पतालमा उपचारको भुक्तानीको लागि १ लाख अमेरिकी डलर बराबरको स्वास्थ्य बीमा गराएको प्रमाण प्रस्तुत गर्नुपर्ने सर्त प्रस्ताव गरिएको छ । डिजिटल घुमन्ते भिसाको म्याद ५ वर्षको भए पनि एक पटकमा अधिकतम एक वर्षको मात्र आवासीय स्वीकृति दिन सुझाव दिइएको छ ।

‘डिजिटल भिसा प्रवेशाज्ञावाहकलाई नेपालको वाणिज्य बैंकमा परिवर्त्य मुद्राको खाता खोल्न दिने,’ आयोगको प्रतिवेदनमा भनिएको छ, ‘उक्त खातामा ५० हजार डलरभन्दा बढी भएमा बढी भए जतिको रकम जुनसुकै बेला पनि विदेशको बैंकमा ट्रान्सफर गर्न दिने । ५ वर्ष भिसा अवधि सकिएपछि भिसा नवीकरण नगराएमा बैंकमा मौज्दात बाँकी रहेको पुरै रकम लैजान दिने ।’