मकवानपुर — बागमती प्रदेशमा घरेलु तथा साना उद्योग खोल्ने क्रम निरन्तर घट्दो अवस्थामा रहेको छ । आर्थिक मन्दी र लगानीमैत्री वातावरण नहुँदा पछिल्लो तीन वर्षमा नयाँ उद्योग खोल्ने क्रम घटिरहेको हो ।

बागमती प्रदेशको उद्योग, वाणिज्य, भूमि तथा प्रशासन मन्त्रालयको तथ्यांक अनुसार गत आर्थिक वर्ष २०८०/८१ मा ६ हजार ५४३ घरेलु तथा साना उद्योग दर्ता भएका थिए । तर, चालु आर्थिक वर्ष २०८१/८२ को फागुन मसान्तसम्म आइपुग्दा ४ हजार २५५ मात्रै नयाँ घरेलु तथा साना उद्योग दर्ता भएको मन्त्रालयले जनाएको छ । 

मन्त्रालयको उद्योग शाखा अधिकृत चौलाकान्ता वाग्लेका अनुसार अघिल्लो आवको तुलनामा चालु आवमा नयाँ उद्योग दर्ता हुनेको संख्यामा केही कमी आएको हो । चालु आर्थिक वर्ष २०८१/८२ को फागुन मसान्तसम्म सिन्धुली जिल्लामा १३२ वटा घरेलु तथा साना उद्योग नयाा दर्ता भएको उनले बताए ।

रामेछाप जिल्लामा ६१, दोलखामा १८१ र सिन्धुपाल्चोकमा ४० वटा घरेलु तथा साना उद्योग दर्ता भएको छ । काभ्रे जिल्लामा ३ सय ७०, भक्तपुर जिल्लामा १ हजार १२४ र ललितपुरमा ३५७ साना उद्योग दर्ता भएका छन् । 

घरेलु तथा साना उद्योग दर्ता हुने जिल्लामा सबैभन्दा धेरै काठमाडौं जिल्लामा १ हजार २५३ रहेको छ भने सबैभन्दा कम दर्ता भएको रसुवा जिल्लामा ३१ वटा मात्रै दर्ता भएका छन् । 

नुवाकोटमा १ सय, धादिङमा ९४, चितवनमा २ सय १३ र मकवानपुर जिल्लामा २ सय ९६ घरेलु तथा साना उद्योग मन्त्रालय मातहतका कार्यालय उद्योग तथा वाणिज्य कार्यालयहरुमा दर्ता भएका छन् भने ३ वटा उद्योग निर्देशानलयमा दर्ता भएको उद्योग शाखा अधिकृत वाग्लेले जानकारी दिए ।