सिन्धुपाल्चोक — भोटेकोशी र सुनकोशी करिडोर क्षेत्रका होटल र रिसोर्ट पर्यटकले खचाखच हुन थालेका छन् । गर्मी सुरु भएलगत्तै साहसिक खेल ‘एडभेन्चर र्‍याफ्टिङ’ मा चिनिएको सुनकोशी नदीको सुकुटे क्षेत्रमा पर्यटकको घुइँचो लाग्न थालेको हो ।

‘र्‍याफ्टिङ’ गर्न आउने पर्यटकको संख्या अहिले दोब्बर भएकाले यहाँका सबै रिसोर्ट व्यस्त रहेको सिन्धु सुकुटे पर्यटन व्यवसायी संघका अध्यक्ष महेन्द्रसिं थापाले जनाए । ‘दिनहुँ चार सयभन्दा बढी आन्तरिक र बाह्य पर्यटक र्‍याफ्टिङका लागि आउन थालेका छन्, सबै रिसोर्ट–होटललाई भ्याइनभ्याइ छ,’ उनले भने । 

जाडो सकिएलगत्तै एडभेन्चर र्‍याफ्टिङको सिजन हालै सुरु भइसकेकाले पर्यटकको संख्या दिनहुँ बढ्ने अनुमान गरिएको छ । ‘र्‍याफ्टिङ’ ले लोभिएर दिनहुँ एक रिसोर्टमा न्यूनतम ५० आन्तरिक र २० बाह्य पर्यटक आउने गरेको थापाको भनाइ छ । र्‍याफ्टिङ र क्यानोनिङ एडभेन्जरको मनोरञ्जन गर्न सिन्धुपाल्चोकमा साता दिनमा दुई हजारसम्म पर्यटक भित्रिएका छन् । 

काठमाडौंदेखि युरोप, अमेरिकालगायत मुलुकबाट आउने पर्यटक सुनकोशीमा र्‍याफ्टिङका लागि यहाँ पुग्ने गरेका हुन् । यसबाहेक माउन्ट बाइक राइडिङदेखि साहसिक खेल मानिने बन्जीजम्पलाई पर्यटकले लक्ष्य बनाएका हुन्छन् । ‘शुक्रबार र शनिबार यहाँका रिसोर्ट पूर्ण रूपमा भरिने गरेकाले पर्यटक पहिल्यै बुकिङ गरेर आउने गरेका छन्,’ सुकुटे रिभर फन रिसोर्टका पर्यटन व्यवसायी ललित गिरीले भने । गर्मी सिजनमा यहाँ पर्यटकको भीड लाग्ने गरेको हो ।