कास्की — पोखरामा १३ औं संस्करणको राष्ट्रिय हेमजा आलु महोत्सव सुरू भएको छ । पोखरा महानगरपालिका–२५ स्थित विष्णुपादुका क्लबको आयोजनामा ‘सुन्दर ठाउँ हेमजा जाऊँ, आलुका स्वादिष्ट परिकार खाऊँ : आलु एक परिकार अनेक’ भन्ने मूल नारासहित आइतबारदेखि महोत्सव सुरू भएको हो । 

महोत्सवको पोखरा महानगरपालिका प्रमुख धनराज आचार्यले उद्घाटन गरे । उनले कृषि उपजलाई केन्द्रमा राखेर महोत्सव गरिनु प्रशंसनीय भएको बताए । पोखरामा तरबुजा खेती सम्भव भएको र आलुको अन्तर्राष्ट्रिय सम्भावना राम्रो रहेको उनले बताए । पोखराका सबै वडामा उत्पादनअनुसार पकेट क्षेत्र घोषणा गर्ने योजना मेयर आचार्यले सुनाए । 

कृषि, भूमि व्यवस्था तथा सहकारी मन्त्रालय गण्डकी सचिव बासुदेव रेग्मीले खेतीयोग्य जमिनमा घडेरी बन्नु दुःखद भएको बताए । हेमजाको परिचय नै आलु भएको उल्लेख गर्दै उनले उत्पादन वृद्धितर्फ ध्यान दिन स्थानीयलाई आग्रह गरे ।