उनले भने, ‘हामीले खास गरेर नेपालमा लगानी गर्नका लागि थाई व्यवसायीहरूलाई आग्रह गर्‍यौँ। हामीले उनहरूलाई नेपालको पुराना कानुनहरू परिवर्तन भइसकेको र लगानीका लागि सहज वातावरण बनेको तथा सरकारले पनि विदेशी लगानीलाई प्राथमिकता दिएको भन्दै लगानीको आह्वान गर्‍यौँ। उनीहरू पनि पर्यटन, हस्पिटालिटी लगायतका क्षेत्रमा इच्छा देखाएका छन्।'

थाई व्यवसायीहरूले नेपालमा राजनीतिक स्थिरता नभएको कारण लगानी प्रभावित हुने कुरा राखेको अध्यक्ष ढकालले बताए । सरकारले वैदेशिक लगानी सहजीकरणका लागि नीति समेत फेरबदल गरेको कारण लगानी प्रभावित नहुने धारणा आफूहरूले राखेको उनको भनाइ छ।

बिमस्टेक चेम्बर गठन गर्ने प्रक्रियामा पनि सदस्य राष्ट्रहरूसँग छलफल गरेर सक्रिय बनाउने कुरामा आफूहरू अघि बढेको बताए ।

उनले भने, 'हामीले नेपालबाट जाने उद्योगीहरूलाई अनअराइभल भिसाका लागि थाई सरकारसँग पहल गरिदिनुहोस् भनेर आग्रह गरेका छौँ। उहाँहरूले पहल गर्ने बताउनुभयो। उहाँहरूले नेपालमा राजनीतिक स्थिरता नभएको हुनाले लगानीको सम्भावनामा शंका रहेको चिन्ता पनि व्यक्त गर्नुभयो। हामीले राजनीतिक क्रियाकलाप र आर्थिक पाटो भिन्नै भएकाले अहिले नीति समेत परिवर्तन भएको कारण त्यसले फरक पार्दैन भन्ने धारणा राखेका छौँ।’