काठमाडौँ — साप्ताहिक कारोबारको अन्तिम दिन बिहीबार नेप्से परिसूचक ३.३५ अंकले बढेर बन्द भएको छ । अघिल्लो दिनको तुलनामा शून्य दशमलव १२ प्रतिशतले बढेर समग्र नेप्से २ हजार ७ सय ३.३९ बिन्दुमा उक्लिएको हो । नेप्से बुधबार २३.८६ अंकले बढेर २ हजार ७ सय बिन्दुमा उक्लिएको थियो ।

बिहीबार दिउँसो १२.२४ बजे २ हजार ७ सय ३२.४९ मा पुगेको नेप्से कारोबार बन्द हुँदा घटेर २ हजार ७ सय ३ मा ओर्लेको हो ।

उक्त दिन कुल ९३ कम्पनीको सेयर मूल्य बढ्यो भने १५१ कम्पनीको मूल्य घट्यो । बिहीबार ६९ हजार ८९ पटकको सेयर किनबेचबाट ७ अर्ब ८४ करोड ४६ लाख ४२ हजार रुपैयाँको सेयर कारोबार भएको छ । सो दिन कुल १ करोड ५५ लाख २ हजार ९ सय ९८ कित्ता सेयर किनबेच भए । 

बैंकिङ, जलविद्युत्, निर्जीवन बिमा र अन्यबाहेक बाँकी सबै उपसमूहको परिसूचक घट्यो । यसअनुसार बैंकिङ उपसमूहको परिसूचक १३.१३, जलविद्युत्को १.३८, निर्जीवन बिमाको ७२.४९ र अन्य ३५.४७ अंकले बढे । तर, जीवन बिमा उपसमूहको परिसूचक ९०.२०, व्यापारको ८१.२२, उत्पादन तथा प्रशोधनको ७०.२४ र फाइनान्स कम्पनीको ४१.९७ अंकले घटेको नेप्सेले जनाएको छ ।

बिहीबार धेरै कमाउने कम्पनीमध्ये सबैभन्दा अघि ग्रिन भेन्चर्स लिमिटेड रह्यो । यो कम्पनीको सेयर मूल्य ९.९९ प्रतिशतले बढ्यो । सुपर मादी हाइड्रोपावरको सेयर मूल्य ६.९५, राधी विद्युत् कम्पनीको ४.९०, एनएलजी इन्स्योरेन्स कम्पनीको ४.६३, नेपाल एसबीआई बैंक ऋणपत्र २०८९ को २.७५, युनिभर्सल पावर कम्पनीको २.७३ प्रतिशतले सेयर मूल्य बढ्यो ।

हिमालयन रि–इन्स्योरेन्सको सेयर मूल्य २.७०, नेपाल रि–इन्स्योरेन्स कम्पनीको २.२७, सानिमा डिबेञ्चर २०८९ को २ र बीओके डिबेन्चर २०८६(क) को २ प्रतिशतले बढेको नेप्सेले बताएको छ ।