काठमाडौँ — मंगलबार समग्र नेप्से परिसूचकसँगै र सेयर कारोबार रकममा पनि गिरावट आएको छ । अघिल्ला तीन दिन लगातार दोहोरो अंकले बढेको नेप्से मंगलबार १६.९५ अंकले घटेको छ । आइतबारको तुलनामा शून्य दशमलव ६२ प्रतिशतले घटेर समग्र नेप्से २६७६.१७ बिन्दुमा ओर्लेको छ ।

आइतबार २९.८२ अंकले बढेर नेप्से २ हजार ६ सय ९३.१२ बिन्दुमा पुगेर बन्द भएको थियो । 

गत बुधबार ३९.१३ र बिहीबार ४१.४३ अंकले नेप्से बढेको थियो । अघिल्ला तीन कारोबार दिन नेप्से ११० अंकले बढेको थियो । यही कारण केही अल्पकालीन लगानीकर्ताले मुनाफा सुरक्षित गर्न (प्रोफिट बुक) गर्न सेयर बिक्री गर्न थालेपछि मंगलबार बजारमा नकारात्मक असर परेको हो ।

नेप्से घटेसँगै सेयर बजारको आकार (कुल बजार पुँजीकरण) पनि ४४ खर्ब ४३ अर्ब रुपैयाँमा खुम्चिएको छ । आइतबार कुल बजार पुँजीकरण ४४ खर्ब ७१ अर्ब रुपैयाँ कायम भएको थियो ।

आइतबारको तुलनामा सोमबार नेप्से करोबार पनि घटेको छ । आइतबार ७ अर्ब ५६ करोड ८२ लाख २६ हजार रुपैयाँ कारोबार भएकामा मंगलबार ५ अर्ब ७९ करोड ७७ लाख ९१ हजार रुपैयाँको कारोबार भएको छ । सार्वजनिक बिदा भएका कारण सोमबार सेयर कारोबार भएन ।

मंगलबार ४२ कम्पनीको सेयर मूल्य बढ्यो भने २०१ कम्पनीको मूल्य घट्यो । यस दिन ५६ हजार ५ सय ४८ पटकको सेयर किनबेचबाट १ करोड ६ लाख ७० हजार ६ सय ४९ कित्ता सेयर किनबेच भयो । व्यापारबाहेक सबै उपसमूहको परिसूचक घट्यो । उक्त दिन व्यापार उपसमूहको परिसूचक सबैभन्दा बढी १६३.५० अंकले बढ्यो भने होटल तथा पर्यटन ११३.५३ अंकले घट्यो । जीवन बिमा उपसमूहको परिसूचक ८६.३२, लघुवित्तको ५४.४४ र विकास बैंकको ५२.८३ अंकले घटे ।

मंगलबार गार्डियन माइक्रो लाइफ इन्स्योरेन्सको सेयर मूल्यमा १० प्रतिशतले बढ्दा सर्किट ब्रेकरमार्फत कारोबार नियन्त्रण गरिएको थियो । राधी विद्युत् कम्पनीको ४.२८, सयपत्री हाइड्रोपावरको ४.१५, विशाल बजार कम्पनीको ४.०६ र कुमारी सबल योजनाको ३.२८ प्रतिशतले सेयर मूल्य बढे ।

गुराँस लघुवित्त वित्तीय संस्थाको ५.५६, छ्याङ्दी हाइड्रोपावरको ४.३६, उपकार लघुवित्त वित्तीय संस्थाको ४.०५, दोर्दी खोला जलविद्युत्को ३.६५ र आरबीबी म्युचअल फन्ड २ को ३.५४ प्रतिशतले लगानीकर्ताहरूको सेयर मूल्य घटेको छ ।

कारोबार रकमका आधारमा भने हिमालयन रिइन्स्योरेन्स, एनआरएन इन्फ्रास्ट्रक्चर एन्ड डेभलपमेन्ट, सीईडीबी होल्डिङ्स, नेपाल रिइन्स्योरेन्स कम्पनी, हिमालयन पावर पार्टनर अघि रहे ।