काठमाडौँ — वैकल्पिक ऊर्जा प्रवर्द्धन केन्द्रका कार्यकारी निर्देशक नवराज ढकालले सन् २००५ देखि अहिलेसम्म कार्बन बिक्रीबाट चार अर्ब ८३ करोड आम्दानी गरेको बताएका छन् । उनले 'ऊर्जा क्षेत्रमा जलवायु वित्त लगानीका अवसरहरु तथा केन्द्रको योगदान'  बारे बाेल्दै उनले करीब ६४ लाख युनिट बराबर कार्बन उत्सर्जन न्यूनीकरण गरी कार्बन बिक्रीबाट चार अर्ब ८३ करोड आम्दानी गरिसकेको बताएका हुन् । 

केन्द्रले आगामी मे १६ देखि १८ सम्म आयोजना हुन लागेको ‘सगरमाथा संवाद' को पूर्वसन्ध्यामा 'ऊर्जा आयोजनामा कार्बन वित्त लगानीका अवसर सम्बन्धी राष्ट्रिय गोष्ठी' आयोजना गरेको थियो ।

पेरिस सम्झौताको धारा ६ (प्रकरण ६.२ र ६.४) मा बजारमा आधारित दृष्टिकोण सहितको न्यूनीकरण संयन्त्रको व्यवस्था गरिएको छ भने प्रकरण ६.८ मा गैर-बजारीय दृष्टिकोण सहितको न्यूनीकरण संयन्त्रको व्यवस्था गरिएको  केन्द्रका कार्यकारी निर्देशक ढकालले जनाए । धारा ६ मा व्यवस्था गरिएका अनुपालन कार्बन व्यापार र स्वेच्छिक कार्बन व्यापारको नेपालाम ठूलो सम्भाव्यता रहेको उनको भनाइ छ । 

नवीकरणीय ऊर्जा तथा ऊर्जा दक्षतामार्फत् स्वच्छ ऊर्जा रुपान्तरणमा योगदान पुर्‍याउन कार्बन वित्त परिचालनमा जोड दिनुपर्ने विज्ञहरुले ‌औंल्याएका छन् । ऊर्जा, जलस्रोत तथा सिँचाइ मन्त्रालयका सहसचिव सुशिलचन्द्र आचार्यको अध्यक्षतामा सञ्चालित उक्त प्राविधिक सत्रमा छलफलमा सहभागी वक्ताहरुले यस्तो बताएका हुन् । 

गोष्ठीको उद्‍घाटन समारोहमा ऊर्जामन्त्री खड्काले कार्बन बिक्रीबापतको रकम गरिब, आर्थिक अवस्था कमजोर भएका, पिछडिएका वर्गका नागरिकको हितमा परिचालन गर्नुपर्नेमा जोड दिए । कार्बन कोषमार्फत् दूरदराजमा रहेका गरिब, विपन्न र पिछडिएका जनताका लागि सोलारसहित मिटर राखिदिएमा स्थानीयलाई आम्दानीको वातावरण निर्माण हुने र यो कार्यले सरकारले राखेको विपन्न नागरिकलाई समृद्ध बनाउने लक्ष्यमा सहयोग पुग्ने उनले बताए । साथै मन्त्री खड्काले कार्बन उत्सर्जन न्यूनीकरणमा साझा प्रयासको खाँचो रहेको उनको भनाइ थियो ।