काठमाडौँ — थाइल्यान्ड र मध्यपूर्वबाट हिउँदयाममा भैरहवास्थित गौतम बुद्ध अन्तर्राष्ट्रिय विमानस्थलमा उडान गर्दै आएका चारवटा विदेशी वायुसेवाले ग्रीष्मकालीन मौसममा त्यहाँ उडान नगर्ने भएका छन् ।

बैंककबाट उडान गर्ने थाई एयर एसिया, कुवेतबाट उडान गर्ने जजिरा एयरवेज, दुबईबाट उडान गर्ने फ्लाई दुबई र दोहाबाट उडान गर्ने कतार एयरवेजले १८चैत २०८१ देखि सुरु भई ८ कात्तिक ०८२ सम्म सञ्चालन हुने ग्रीष्मकालीन मौसममा भैरहवामा उडान नगर्ने भएका हुन । यीबाहेक अरु विदेशी वायुसेवाले पनि ग्रीष्मकालीन मौसममा भैरहवामा उडान गर्न इच्छा व्यक्त गरेनन् ।

देशभरका विमानस्थलमा उडान सञ्चालन गर्न नेपाल नागरिक उड्डयन प्राधिकरणले हिउँद र गर्मी यामका लागि दुईपटक उडान तालिकाका लागि आह्वान गर्छ । यो अन्तर्राष्ट्रिय नियम हो । विभिन्न देशसँग भएको हवाई सम्झौताअनुसार काठमाडौं विमानस्थलमा रहेको स्लट म्यानेजमेन्ट कमिटीले आन्तरिक र अन्तर्राष्ट्रिय उडानका तालिका स्वीकृत गर्छ । यसैअनुसार काठमाडौं विमानस्थलका महाप्रबन्धक जगन्नाथ निरौलाको संयोजकत्वको ११ सदस्यीय समितिले फागुन १९ गते ग्रीष्मकालीन मौसमका लागि काठमाडौं, भैरहवा र पोखरासहितका विमानस्थलकालागि तालिका स्वीकृतिका लागि प्राधिकरणमा सिफारिस गरेको थियो ।

उक्त समितिले सिफारिस गरेको तालिकालाई प्राधिकरणले केही दिनअघि पारित गरेको थियो । ‘पर्याप्त लोड (यात्रु/कार्गो नभएका कारण विदेशी वायुसेवाले गर्मी सिजनमा भैरहवामा उडान नगर्ने भएका हुन,’ प्राधिकरणका सहप्रवक्ता ज्ञानेन्द्र भुलले भने,‘ त्यहाँ उडान गर्दै आएका कतार, थाई एयर एसिया, फ्लाई दुबई र जजिराले काठमाडौंमा उडान गर्ने भएका छन् ।’ उनका अनुसार जजिरा र थाई एयर एसियाले दैनिक एक/एक तथा फ्लाई दुबईले सातामा ४ वटा उडान काठमाडौंका लागि गर्ने अनुमति पाएको छ ।

यसैबीच काठमाडौं विमानस्थल १९ चैतदेखि बिहान ६ बजेबाट राति १२ बजेसम्म १८ घण्टा सञ्चालनमा आउने भएको छ । गत वर्ष काठमाडौं विमानस्थल राति ३ बजेसम्म २१ घण्टा सञ्चालनमा ल्याइएको थियो । यसपटक भने १२ बजेपछि बिहान ६ बजेसम्म पूर्वाधारका काम हुने छन् । ‘गत वर्ष ग्रीष्मयाममा राति १२ बजेपछि बिहान ३ बजेसम्म कतार र फ्लाई दुबईको दुइटा उडान थिए । योपटक ती उडानलाई राति १२ बजेभित्र समेटेर तालिका ल्याइएको छ,’ सहप्रवक्ता भुलले भने ।

पूर्वाधार विस्तारका लागि भन्दै कात्तिक २३ देखि काठमाडौं विमानस्थल राति १० बजेदेखि बिहान ८ बजेसम्म बन्द गरेर १४ घन्टामात्रै सञ्चालनमा ल्याइएको थियो । राति १० घण्टा पूर्वाधार विस्तारका कामलाई प्राथमिकता दिइएको थियो । राति १० बजेपछि काठमाडौं विमानस्थल बन्द हुने भएपछि प्राधिकरणले दैनिक चारवटा उडान गर्ने तथा काठमाडौंमा नयाँ उडान अनुमति माग्ने वायुसेवा कतार, फ्लाई दुबई, थाई एयर एसिया र जजिराका उडानलाई सर्तसहित भैरहवा पठाएको थियो । ‘यी सबै वायुसेवाले भैरहवामा हरेक उडानमा लाखौं रुपैयाँ नोक्सानी बेहोर्नु परेको बताए,’ प्राधिकरणका एक उच्च अधिकारीले भने,‘निजी क्षेत्रलाई हरेक दिन करोडौं घाटा बेहोर्न दबाद दिन सकिँदैन । राज्यले छुटसहितका प्याकेज ल्याउदा पनि भैरहवा सञ्चालन गर्न सकिएन ।’