कञ्चनपुर — महाकाली नदीमा निर्माण गरिएको पक्की पुलको पूर्वतर्फको गाइडबन्ड बगाएको ६ महिनासम्म पुनर्निर्माण सुरु हुन सकेको छैन । बर्खा नजिकिए पनि गाइडबन्ड निर्माणको सुरसार नहुँदा महाकालीको बाढी पुलको पहुँचमार्ग भत्काएर बस्तीमै पस्ने जोखिम बढेको छ ।

गत भदौ अन्तिम साता महाकालीको बाढी गाइडबन्ड भत्काएर पुलछेउमै निर्माण भइरहेको पोखरीमा पसेको थियो । ‘महाकालीमा अब दुई महिना मात्रै काम गर्न सकिन्छ, अहिलेसम्म निर्माण गर्ने सुरसार छैन,’ भीमदत्त नगरपालिका–१२ का पूर्ववडाध्यक्ष कृष्णसिंह देउवाले भने, ‘कम्तीमा बाढीले भत्काएको ठाउँमा गाइडबन्ड बनाइदिनुपर्छ भन्ने हाम्रो माग छ । त्यो बनाउन नसके पहुँचमार्ग भत्काएर बाढी बस्ती पस्ने जोखिम हुन्छ ।’ 

२०७८ कात्तिकमा महाकालीमा हालसम्मकै ठूलो बाढी आएको थियो । त्यतिबेला महाकालीको जलस्तर ५ लाख ४७ हजार क्युसेक पुगेको थियो । बाढीले निर्माणाधीन पक्की पुलको पहुँचमार्ग भत्काएको थियो । गत भदौमा पनि महाकालीमा ४ लाख ६१ हजार क्युसेक बाढी पुगेको थियो । बाढीले पुलछेउमा निर्माण गरिएको पोखरीको गाइडबन्डको करिब दुई मिटर भत्काएको हो । 

‘कम्तीमा भत्काएको स्थानमा काम गर्ने वातावरण बनाइदिनुपर्‍यो भनिरहेका छौं,’ महाकाली पुल निर्माणमा संलग्न कम्पनीले कुमार श्रेष्ठ सीएफईसी जेभीका इन्जिनियर किशोर पाण्डेयले भने, ‘अब पनि काम सुरु गर्न नसके बर्खामा जोखिम निम्तिन सक्छ ।’ गाइडबाटै बाढी पोखरीमा पसेर पहुँचमार्गसमेत भत्काएर बस्ती छिर्ने जोखिम रहेको उनले बताए । भीमदत्त र दोधारा चाँदनी नगरपालिका जोड्ने गरी महाकाली नदीमा निर्माण गरिएको चार लेनको पुलको लम्बाइ ८ सय मिटर छ । नदीको चौडाइ भने २ किलोमिटर छ । नदीका दुवैतर्फ ६/६ सय मिटर चौडाइ र २८ सय मिटर लम्बाइका पोखरी बनाइन लागेको हो ।