ताप्लेजुङ — २१.९३ मेगावाट क्षमताको काबेली–३ जलविद्युत् परियोजनाको उत्पादन चैत पहिलो साताभित्रै सुरु हुने भएको छ । सिरिजंघा गाउँपालिकामा उत्पादन गर्न लागिएको परियोजना निर्माणको काम अन्तिम चरणमा पुगेको आयोजनाले जनाएको छ ।

भौतिक संरचना निर्माणको काम सकिइसकेको आयोजनाका जनसम्पर्क अधिकृत मेघनाथ ढुंगानाले बताए । ‘निर्माणको काम अन्तिम चरणमा पुगेको छ, आउँदो चैत पहिलो सातासम्म विद्युत् सुरु गर्ने तयारीमा छौं ।’ यसको निर्माण काबेली हाइड्रोपावर कम्पनीले गर्दै आएको छ । 

चैत मसान्तभित्र सम्पन्न गर्ने गरी २०७९ माघदेखि काम सुरु भएको थियो । सिरिजंघा–५ पेदाङ, वडा ६ मामाङखे र वडा ७ खेबाङमा आयोजनास्थल छ । मामाङ्खे र खेबाङको सिमाना भएर बहने ओथम्मा गहिरी मुहानदेखि ५.१२८ किलोमिटर सुरुङमार्फत विद्युत् गृहमा पुर्‍याइएको छ । यहाँ उत्पादित बिजुली पाँचथरको हिलिहाङ गाउँपालिकामा रहेको नेपाल विद्युत् प्राधिकरणको १३२ केभीए अमरपुर सबस्टेसनमा जडान गरिनेछ ।