सडकका बीचमा रहेका चार टावर हटाएर राखिने मोनोपोलको जग निर्माण जारी
काठमाडौँ — बुटवल उपमहानगरपालिका–११ स्थित कालिकापथको योगिकुटी चोकदेखि होराइजन चोकसम्मको सडकखण्डमा प्रसारण लाइनको मोनोपोल राख्ने काम धमाधम भइरहेको छ ।
बुटवलबाट मोतीपुरतर्फको १३२ केभी डबल सर्किट प्रसारण लाइनको टावर (चार खुट्टा भएको) लाई हटाएर योगिकुटी–होराइजन चोक सडक खण्डमा मोनोपोल (एउटा मात्र खुट्टा) राख्न लागिएको हो ।
करिब एक किलोमिटर सडक खण्डको बीचमा रहेका चार टावरलाई हटाएर राखिने मोनोपोलको जग (फाउन्डेसन) निर्माण भइरहेको छ । फाउन्डेसनको काम १५ दिनभित्र सकिनेछ । मोनोपोल निर्माणस्थलमा आपूर्ति भइसकेको छ ।
उक्त सडक खण्डमा ३०/३० मिटरका दुई र ३२/३२ मिटरका दुई मोनोपोल जडान गरिनेछ । सञ्चालनमा रहेको प्रसारण लाइनलाई करिब १५ दिन बन्द (सटडाउन) गरेर मोनोपोल जडान गरिने नेपाल विद्युत् प्राधिकरणले जनाएको छ । उक्त खण्डमा रहेका पुरानो टावर हटाइनेछ । तार (कन्डक्टर) पनि नयाँ प्रयोग गरिने प्राधिकरणले जनाएको छ ।
निर्माणस्थलको अनुगमन गरी गर्मी सुरु हुनुअघि नै मोनोपोल जडान गरिसक्न प्राधिकरणका कार्यकारी निर्देशक कुलमान घिसिङले आग्रह गरे । गर्मी सुरु भएपछि बुटवल क्षेत्रमा बिजुलीको माग बढ्ने हुँदा प्रसारण लाइन सटडाउन दिन समस्या हुने भएकाले त्यसअघि नै काम सक्न घिसिङले बुटवल ग्रिड महाशाखालाई निर्देशन दिए ।
सडक र प्रसारण लाइन (तार) बीचको काम हुँदा सडकमा ठूला गाडीले लाइन छोए हुन सक्ने दुर्घटना अन्त्य गर्न योगिकुटी–होराइजन चोक सडकखण्डमा मोनोपोल राख्न लागिएको हो । हाल सडक र लाइनबीचको दूरी ६ मिटरभन्दा कम छ । मानोपोल राखिएपछि सडक र लाइनबीचको दूरी करिब नौ मिटर हुनेछ । प्रसारण लाइनको टावर हाल बीचमा हुँदा उक्त सडक खण्ड साँघुरो छ । हालको टावरको बेसमेन्टको व्यास करिब ८ मिटर छ । मोनोपोलको बेसमेन्टको व्यास करिब साढे दुई मिटर मात्र हुनेछ । यसले गर्दा सडक पनि फराकिलो हुने र मोनोपोल राखिएपछि हालको प्रसारण लाइनको मार्गधिकार घट्ने भएकाले दायाँबायाँका घर पनि थप सुरक्षित हुनेछन् ।
मोनोपोल निर्माणका लागि ३ करोड ६५ लाख रुपैयाँमा ठेक्का सम्झौता भएको थियो । प्राधिकरणको लगानीमा निर्माण भइरहेको मोनोपोलको सम्पूर्ण काम अगामी जेठभित्र सम्पन्न गर्ने लक्ष्य छ ।
