काठमाडौँ — नेपाललाई हङकङ हुँदै अस्ट्रेलिया र जापान लगायतका मुलुकसँग जोड्दै आएको क्याथे प्यासिफिक एयरलायन्सले सातै दिन उडान गर्ने भएको छ । 

क्याथेले मंगलबार काठमाडौंमा एक कार्यक्रममार्फत पहिलोपटक सातै दिन उडान गर्ने घोषणा गरेको हो । यसअघि यसले सातामा ५ दिन हङकङ–काठमाडौं उडान गर्दै आएको थियो । यसले यो रुटमा वाइडबडी विमानबाट सेवा दिँदै आएको छ । यो रुटमा नेपाल वायुसेवा निगमले सातामा दुई दिन उडान गर्छ ।

थप उडानले नेपाली यात्रुहरुलाई सहुलियत टिकट प्राप्त हुने तथा हङकङ र बाहिरका गन्तव्यहरुका लागि पनि सरल हवाई कनेक्टीभीटी हुने छ । क्याथेको दक्षिण एशिया, मध्यपूर्व र अफ्रिकाका क्षेत्रीय महाप्रबन्धक राकेश राईकारले क्याथेको नेपाल उडान यस क्षेत्रकै लागि मूल्यवान भएको भन्दै सन् २०२५ यता नयाँ अवसरसहित क्याथे उडानमा संलग्न हुने बताए ।