ताप्लेजुङ — सिरिजंगा गाउँपालिकामा निर्माण भएको १२ मेगावाट क्षमताको सुपर काबेली जलविद्युत आयोजनाको बिजुली बिहीबारदेखि राष्ट्रिय प्रसारण लाइनमा जोडिएको छ ।

हिलटन हाइड्रो इनर्जी लिमिटेडद्वारा उत्पादित बिजुली पाँचथरको अमरपुर सबस्टेसनमार्फत राष्ट्रिय प्रसारण लाइनमा जोडिएको हो । जुन १३२ केभी प्रसारण लाइनको अमरपुरबाट दुबीचौरमा रहेको नेपाल विद्युत् प्राधिकरणको सबस्टेसनमा समाहित गरिन्छ । यो काबेली नदीबाट उत्पादित बिजुली हो ।

२०७९ पुस २५ बाट सुरु भएको यो आयोजनाको निर्माण अवधि २०८१ चैत १० सम्म थियो । एक महिनाअगावै उत्पादन गरी राष्ट्रिय प्रसारण लाइनमा जडान गरिएको आयोजनाका जनसम्पर्क अधिकृत मेघनाथ ढुंगानाले बताए । आयोजनाको कुल लागत २ अर्ब १४ करोड ३८ लाख रहेको छ ।