काठमाडौँ — रसुवा भन्सारबाट सुटकेस र सिरक जाँचपास गराएर जुत्ता पैठारी गरेको अभियोगमा करिब पौने ११ करोड राजस्व छलीको मागदाबीसहित उच्च अदालत पाटनमा तीन जनाविरुद्ध मुद्दा दायर गरिएको छ ।

राजस्व अनुसन्धान विभागले एउटा मालवस्तु जाँचपास गरेर अर्कै कन्टेनरमा सामान राखेर चोरी पैठारी गरेको फेला पारेपछि तीन महिनादेखि अनुसन्धान गरिरहेको थियो । अनुसन्धानका आधारमा राजस्व चुहावटको मुद्दा दायर गरेको हो । 

गत मंसिर ४ गते रसुवा भन्सारमा सुटकेस र सिरक जाँचपास गराएर काठमाडौं आउँदै गरेको ना ३ ख ७०१ नम्बरको कन्टेरमा ३ हजार ३ सय ७२ जोर ब्रान्डेड जुत्ता भेटिएको थियो । जुत्ताको भने राजस्व नतिरी पैठारी गरिएको थियो । 

बम्जन इन्टरप्राइजेजको नाममा आयात गरेको सुटकेस र सिरक रसुवामै राखेर जुत्ता ल्याएको भेटिएको थियो । अनुसन्धानका क्रममा जाँचपास गरेर सील लगाएको ७०१ नम्बरको कन्टेनरमा रहेको सिरक ना ६ ख ४८९४ मा राखिएको भेटिएको छ । 

त्यस्तै सोही कन्टेनरमा जाँचपास गरेको सुटकेस ना ६ ख १००० नम्बरको कन्टेनरमा राखिएको भेटिएको छ । उक्त दुवै कन्टेनर अहिले पनि रसुवा भन्सार हातामा छन् । उक्त इन्टरप्राइजेजका मालिक सिन्धुपाल्चोक लिसंखुपाखर गाउँपालिका–६ का बुद्ध लामासहित कन्टेनर नियन्त्रणमा लिएर अनुसन्धान गरिएको थियो ।

विभागले बुद्ध, जुत्ता पैठारीमा सघाउने गुल्मी रुरु गाउँपालिका–५ का कुमार श्रेष्ठ र भन्सार एजेन्ट नौल बहादुर तामाङविरुद्ध राजस्व चुहावटको मुद्दा लगाएको हो । बुद्धबाट २ करोड ८० लाख ६६ हजार ७ सय ५९ बिगो र शतप्रतिशत जरिवानासहित ५ करोड ६१ लाख ३३ हजार ५ सय १८ रुपैंयाँ असुल्नुपर्ने माग गरिएको छ । 

जुत्ता आयातमा सघाएको अभियोगमा श्रेष्ठबाट १ करोड २५ लाख ६७ हजार ९ सय ३४ रुपैंयाँ बिगो र शतप्रतिशत जरिवानसमेत २ करोड ५१ लाख ३५ हजार ८ सय ६८ असुल्नुपर्ने माग गरिएको छ । त्यस्तै एजेन्ट नौलबहादुमाथि पनि चोरी पैठारीमा सघाएको अभियोग लगाइएको छ ।