मकवानपुर — एक दशकअघि मकवानपुरको कैलाश गाउँपालिका–९ नामटारको कपचेरी र घैराङडाँडा जोड्ने गरी बनेको नेपालकै पहिलो ‘ग्राभिटी रोपवे’ तार चुँडिँदा ६ महिनादेखि बन्द भएको छ । बिजुली तथा इन्धनबिना गुरुत्वाकर्षण शक्तिबाट चल्ने ‘ग्राभिटी रोपवे’ बन्द भएपछि स्थानीय समस्यामा छन् ।

गत भदौ १४ मा तार चुँडिएर बन्द भएको ग्राभिटी रोपवेको मर्मत हुन सकेको छैन । रोपवेको तार परिवर्तन गरेर मर्मत गर्न नसक्दा स्थानीयले उत्पादन गरेका कृषिजन्य वस्तु बजारसम्म पुर्‍याउन र आवश्यक सामान गाउँमा लैजान समस्या भएको घैराङडाँडाकी ठूलीमाया रुम्बाले बताइन् । रोपवेको तार मर्मत गर्न करिब ७ लाख रुपैयाँ लाग्ने अनुमान गरिए पनि वडा र गाउँपालिका कार्यालयले चासो नदिएको स्थानीयको गुनासो छ ।

१२ सय १४ मिटर लामो ग्राभिटी रोपवे निर्माण भएपछि सडक सञ्जाल नपुगेको घैराङमा तरकारी तथा स्थानीयस्तरमा उत्पादित वस्तु बजार पुर्‍याउन र घरायसी सामग्री ल्याउन सहज भएको थियो । हिँडेर दुई घण्टा लाग्ने बाटोमा रोपवेमार्फत करिब दुई मिनेटमै सामान ओसारपसार गर्न सकिने भएपछि घैराङका स्थानीयले काउली, आलु, मूला, बन्दालगायत तरकारी नामटार बजारसम्म झार्ने गरेका थिए । यस गाउँबाट वार्षिक दुई करोड रुपैयाँभन्दा बढीको तरकारी बिक्री हुँदै आएको कैलाश–९ का वडाध्यक्ष भुवनसिंह घलानले बताए ।

रोपवे मर्मत गर्न आर्थिक सहयोगका लागि वडा कार्यालयमा निवेदन दिए पनि सुनुवाइ नभएको रोपवे उपभोक्ता समितिका अध्यक्ष ठाकुरसिंह रुम्बाको भनाइ छ । विगतमा रोपवे सञ्चालन गर्न ठेक्कामा दिने गरिएको थियो । ठेकेदारहरूले उपभोक्ता समितिलाई रकम नबुझाएकाले मर्मत गर्न समस्या भएको अध्यक्ष रुम्बाले जनाए । रोपवेबाट स्थानीयले प्रतिकिलो दुई रुपैयाँमा सामान ढुवानी गर्ने सुविधा पाएका थिए ।