काठमाडौँ — ऊर्जामन्त्री दीपक खड्काले आफू मन्त्रालयमा नजाँदै जगदुल्ला आयोजनाको ठेक्का प्रक्रिया सुरु भएको र यसअघि पनि रद्द गरिएको बताएका छन् ।प्रतिनिधिसभाको मंगलबारको बैठकमा ऊर्जामन्त्री खड्काले १०६ मेगावाटको जलविद्युत् आयोजनाको ठेक्का पछिल्लो पटक नोटरी नगर्दा रद्द भएको जनाए ।

‘जगदुल्ला आयोजनाको ठेक्का प्रक्रिया म नजाँदै सुरु भएको थियो, त्यसबेला पनि दुई-चार दिनमै त्यसको ठेक्का रद्द गरिएको थियो,' उनले भने, ‘मैले त्यसबेला पनि किन रद्द भयो भनेर सोधेँ, बर्खाका बेला ठेकेदारहरु आयोजनास्थल जान सकेनन् र रद्द गरिएको जानकारी आयो ।’

दोस्रो पटक जगदुल्ला कम्पनीले ठेकेदारले नोटरी नै नगरी कागजात बुझाउँदा ठेक्का रद्द गर्नुपरेको मन्त्री खड्काले सुनाए । ‘चेक आदानप्रदानमार्फत भ्रष्टाचार गरेर आयोजनामा लाग्ने गरिन्छ, ८ वर्षअघिदेखि माओवादी नेतृत्वले ऊर्जा मन्त्रालय चलाइरहेको रहेछ, उहाँहरुले के के गर्नुभयो होला, यस्तै गरिन्छ,’ उनले भने ।

एउटा माननीय र मन्त्रीलाई आरोप लगाउँदा समाजमा के असर पर्छ भनेर समेत ख्याल गर्नुपर्ने खड्काको भनाइ छ । ‘चेक आदानप्रदान गरेको प्रमाणित गर्नुभयो भने उहाँहरुको पछाडि झोला बोकेर हिँड्न तयार छु,’ उनले थपे, ‘मन्त्री होइन, सांसद पदबाटै राजीनामा दिएर झोला बोकेर हिँड्न तयार छु ।’