काठमाडौँ — यस वर्षको प्रणय दिवस (भ्यालेनटाइन डे) मा ४ लाख २५ हजार स्टिक गुलाब खपत हुने अनुमान गरिएको छ । फ्लोरीकल्चर एसोसिएसनका अनुसार काठमाडौं उपत्यकाभित्र २ लाख ५५ हजार स्टिक र उपत्यका बाहिर १ लाख ७० हजार खपत हुनेछ । फेब्रुअरी ७ मा राेज डे मनाउँदै सुरु हुने 'भ्यालेनटाइन विक' फेब्रुअरी १४ मा भ्यालेनटाइन डे मनाउँदै सकिनेछ ।

पछिल्लो समय नेपालमा पनि मनाउँदै आएकाले गुलाबको खपत बढ्दै वर्सेनि बढ्दै गएको एसोसिएसनले जनाएको छ । यस वर्षको प्रणय दिवसमा गुलाबको माग आयातित ७५ प्रतिशत र २५ प्रतिशत आन्तरिक उत्पादनले धान्ने एसोसिएसनका महासचिव हिरामणी शर्माले बताए ।

यसअघिका प्रणय दिवसमा १० प्रतिशत मात्रै आन्तरिक गुलाब हुने गरेको शर्माको भनाइ छ । ‘यसपाली गुलाबको उत्पादन बढेको छ, मौसम पनि अनुकुल भयो, यसपालि २५ प्रतिशत गुलाबको माग आन्तरिक उत्पादनले धान्ने अनुमान छ,’ उनले भने । यस वर्ष गुलाबको मागसँगै मौसम अनुकुल हुँदा आन्तरिक उत्पादन बढेको एसोसिएसनले महासचिव हिरामणी शर्माले बताए ।

हरेक वर्ष गुलाबको माग १५ देखि २० प्रतिशत बढ्ने अनुमान रहेको एसोसिएसनले जनाएको छ । ‘प्रणय दिवसको साताभर ४ करोड ६७ लाख रुपैयाँको कारोबार हुने अनुमान छ,’ एसोसिएसनद्वारा जारी विज्ञप्तीमा उल्लेख छ । प्रति गुलाब ९० देखि १२० रुपैयाँमा कारोबार हुने एसोसियनको अनुमान छ । गत वर्षको प्रणय दिवसमा ४ लाख १२ हजार स्टिक गुलाबको फूल खपत भएको समेत एसोसिएसनले जनाएको छ ।