एआईलाई सदुपयोग गरिए यसले मानवीय श्रम र बौद्धिक क्षमतालाई सहज बनाउने उनको राय थियो । ओलीले प्रविधिको प्रयोगले समाजका विभिन्न क्षेत्रमा सकारात्मक प्रभाव पार्ने भए पनि यसको दुरुपयोगप्रति सचेत रहनुपर्ने बताए । ‘मिथ्या, भ्रामक सूचनाले समाजलाई बिगार्न सक्छ, सही हो कि गलत भनेर छुट्याउन गाह्रो बनाउँछ,’ उनले भने,  ‘त्यसैले एआईको प्रयोग सावधानीपूर्वक गर्नुपर्छ ।’

आईटी क्षेत्र चर्चा मात्रै नभएर अब व्यवसाय, उद्योग र हाम्रो दैनिक जीवनको अभिन्न र महत्त्वपूर्ण अंग बनिसकेको प्रधानमन्त्री ओलीले बताए । नेपालको आर्थिक विकासको सन्दर्भमा बोल्दै उनले पछिल्ला केही वर्षको अन्तरालमा राजनीतिक अस्थिरताका कारण उद्योग, व्यापार, उत्पादन र निर्यात प्रभावित भएको उल्लेख गरे ।

‘त्यस प्रतिकुल असरबाट फेरि अर्थतन्त्रलाई, समाजलाई समयानुकुल ढंगले लयमा फर्काउन, गतिशील बनाउन र अर्को वर्षबाट हामी २०२६ बाटै अल्पविकसितबाट मध्यमस्तरको आय भएको देशमा पुर्याउन चाहन्छौँ,’ प्रधानमन्त्री ओलीले भने, ‘तर हाम्रो आयस्तर न्यून अवस्थामा छ । यस अवस्थालाई हामीले फेर्नु छ । हामी सबै यस कुरामा जुट्नुपरेको छ ।’