बुटवल — ५ वर्षपछि पूर्व–पश्चिम राजमार्गअन्तर्गत बुटवल–गोरुसिंगे ५० किलोमिटर सडक विस्तार सुरु भएको छ । प्रधानमन्त्री केपी शर्मा ओलीले शुक्रबार बुटवलदेखि गोरुसिंगे सडक विस्तारको भर्चुअल माध्यमबाट बुटवल–१३ जितगढीमा शिलान्यास गरे । शिलान्याससँगै विस्तारको काम सुरु भएको आयोजनाले जनाएको छ । 

तीन वर्षभित्रै राजमार्ग विस्तारको काम सम्पन्न हुने प्रधानमन्त्री ओलीले बताए । ‘सुरुङमार्ग, प्रशासनिक भवन, सडकका ठूला आयोजना समयमै सम्पन्न गर्ने र त्यसको प्रतिफल जनताले पाउने अवस्था सुरु भएको छ,’ उनले भने, ‘हामी देश विकासमा धेरै अघि बढिसकेका छौं ।’

शिलान्यास कार्यक्रममा उपप्रधानमन्त्रीद्वय प्रकाशमान सिंह, विष्णुप्रसाद पौडेल, भौतिक यातायात तथा पूर्वाधारमन्त्री देवेन्द्र दाहाल, लुम्बिनीका मुख्यमन्त्री चेतनारायण आचार्य र नेपालका लागि चीनका राजदूत चेन सोङलगायतको भने प्रत्यक्ष उपस्थिति थियो । कार्यक्रममा उनीहरूले पनि सम्बोधन गर्दै सडक तोकिएको समयमै नागरिकलाई सास्ती नहुने गरी निर्माण गर्न निर्माण व्यवसायीलाई आग्रह गरे ।