काठमाडौँ — बैंक तथा वित्तीय संस्था परिसंघ नेपाल (सिबिफिन) को अध्यक्षमा पुनः उपेन्द्र पौड्याल चुनिएका छन् । सिबिफिनको पाँचौं साधारणसभाले शुक्रबार सचिवबाहेक अध्यक्षसहित सबै पदमा सर्वसम्मत नेतृत्व चयन गरेको हो ।

यसअनुसार सिबिफिन कार्यसमितिका १७ मध्ये १६ जना सर्वसम्मत भएका हुन् । पौड्याल यसअघि पनि परिसंघका अध्यक्ष थिए । 

तर सचिव पदमा निर्वाचन भएको छ । उक्त पदका लागि भने साइन रेसुंगा डेभलपमेन्ट बैंकका अध्यक्ष थानेश्वर पौडेल र एक्सेल डेभलपमेन्ट बैंकका अध्यक्ष महेन्द्रकुमार गोयलबीच प्रतिस्पर्धा भएको थियो, जसमा साइनमा पौडेलले ३२ मत ल्याएर जित हासिल गरे भने गोयलले २३ मत प्राप्त गरे । कुल ७६ मतदाता रहेको परिसंघमा ५५ जनाले मतदान गरेका थिए ।

साधारणसभाले पौडेलको नेतृत्वमा नयाँ कार्यसमिति चुनेको हो, जसमा वरिष्ठ उपाध्यक्षमा महालक्ष्मी विकास बैंकका अध्यक्ष राजेश उपाध्याय दोहोरिएका छन् । उपाध्यक्षमा रिलायन्स फाइनान्सका अध्यक्ष कुशप्रसाद मल्ली, महासचिवमा हिमालयन बैंकका अध्यक्ष प्रचण्डबहादुर श्रेष्ठ सर्वसम्मत भएका हुन् ।