विराटनगर — इलामको रोङ गाउँपालिकाले तिते करेलालाई ब्रान्डिङ गरी बिक्री गर्न थालेको छ । यसअघि गुन्द्रुक, सिस्नो, बेसार, मह, चिया र अम्लिसोलाई ब्रान्डिङ गरेको रोङले पछिल्लो पटक गाउँलेले उत्पादन गरेको करेलालाई ब्रान्डिङ गरेको हो ।
‘किसानले उत्पादन गरेको वस्तुलाई नै व्यवस्थित तरिकाले ब्रान्डिङ गरी बिक्री गर्न थालिएको हो,’ गाउँपालिका अध्यक्ष मनिकुमार स्याङ्वो (सुवास) ले भने, ‘रोङको करेला खोज्नेहरूको संख्या बजारमा बढिरहेको छ ।’ तिते करेलालाई केही समय सुकाएर सुकुटी तयार पारिन्छ । त्यसैलाई प्याकेजिङ गरेर बजारमा पठाइन्छ । गाउँपालिकाले यो वर्ष २ सय किलो करेलाको सुकुटी तयार पारेर बजार पठाएको छ । गाउँपालिकाले करेलालाई प्रशोधन गरी सुकुटी बनाउने उद्योग पनि निर्माण गरिरहेको छ ।
‘एक सिजनमा ५० हजार किलोसम्म काँचो करेला प्रशोधन गर्न सक्ने क्षमताको उद्योग हामी बनाउँदै छौं,’ अध्यक्ष स्याङ्वोले भने, ‘उद्योग बनेपछि स्थानीय किसान बढीभन्दा बढी लाभान्वित हुने हाम्रो अनुमान छ ।’
सुकुटी बनाइएको तिते करेला करिब १० मिनेट तातो पानीमा भिजाउँदा पुरानै स्वरूप तथा स्वादमा पाउन सकिन्छ । गाउँपालिकाका सबै वडामा करेलाको उत्पादनका लागि सहायता गरेको छ । किसानलाई करेला फलाउन पहिला प्रोत्साहन गर्ने अनि फलेका करेला आफैं किनेर ब्रान्डिङ गरी बजारसम्म पुर्याउने काम पालिका आफैंले गर्दै आएको छ ।
रोङले खासगरी त्यस भेगको कृषिजन्य उत्पादनलाई बजारीकरण गर्न किसानलाई सघाउँदै आएको छ । रोङमा काँक्रा, फर्सी, स्कुस, टमाटर, सागजन्य तरकारी, तरुल, सुन्तलालगायत कृषिजन्य वस्तु तथा फलफूल बढी उत्पादन हुँदै आएको छ । तर किसानले बजार नपाउँदा ती उत्पादन कुहिएर जाने गरेका छन् ।
‘रोङमा उत्पादित कुनै पनि वस्तु कुहिएर फाल्नुपर्ने या पशुलाई खोले बनाएर खुवाउनुपर्ने अवस्था आउँदैन,’ अध्यक्ष स्याङ्वोले भने, ‘किसानको उत्पादनलाई खेर जान नदिन पालिकाले सक्दो सहयोग गर्छ ।’
