काठमाडौँ — अमेरिकामा रहेका प्रवासी नेपालीमध्ये एक तिहाइभन्दा बढी प्रविधि क्षेत्रमा आबद्ध रहेको एक अध्ययनले देखाएको छ । सर्वांगीण विकास अध्ययन केन्द्र (आईआईडीएस) ले गरेको अध्ययनअनुसार अमेरिकामा रहेका प्रवासी नेपालीमध्ये ३४.७ प्रतिशत प्रविधि क्षेत्रमा कार्यरत छन् । 

सन् २०२० को अमेरिकी जनगणनाअनुसार अमेरिकामा १ लाख ८५ हजारदेखि २ लाख १५ हजार प्रवासी नेपाली रहेको अनुमान छ । ‘नेपाली माइग्रेन्ट ड्रिम्स् इन द अमेरिकन ल्यान्डस्केप’ नामक अध्ययन प्रतिवेदन सोमबार सार्वजनिक हुँदै छ । यसका लेखक अरुणराज जोशी, विभव प्रधान र रुजेल श्रेष्ठ  छन् भने अध्ययनमा स्नेहा घिमिरे, प्रवेश रिजाल, आशिष घिमिरे, श्रीष त्रिपाठी र अदित त्रिपाठीले सघाएका थिए ।

प्रतिवेदनमा अध्ययन, रोजगार, आप्रवासन र अन्य विविध कारणले अमेरिका पुगेका नेपालीहरूको आर्थिक–सामाजिक पक्षहरूको अध्ययन गरिएको जनाइएको छ । प्रविधि क्षेत्रमा संलग्न प्रवासी नेपालीहरू विशेषगरी डेटा इन्जिनियरिङ, सफ्टवेयर इन्जिनियरिङ, डिजिटल मार्केटिङ, सूचना सेवा, बायोटेक्नोलोजी र रासायनिक तथा यान्त्रिक इन्जिनियरिङ जस्ता विविध भूमिकामा क्रियाशील रहेको पनि सो अध्ययनले औंल्याएको छ । 

प्रविधि क्षेत्रमा कार्यरत प्रवासी नेपालीको वार्षिक आम्दानी पनि उल्लेखनीय देखिएको छ । सर्वेक्षणका अनुसार प्रविधि क्षेत्रमा कार्यरत महिलाको वार्षिक औसत आम्दानी ५० हजार अमेरिकी डलर रहेको छ भने पुरुषको औसत आम्दानी ८० हजार अमेरिकी डलर रहेको छ । 

यस अध्ययनले प्रविधिमा प्रवासी नेपालीहरूको बढ्दो दक्षता र उपस्थितिको झल्को दिन्छ । दोस्रो स्थानमा रहेको स्वास्थ्य सेवा क्षेत्रमा १६.१ प्रतिशत, वित्त क्षेत्रमा ८.२ प्रतिशत, शिक्षामा ६.९ प्रतिशत, फुड एन्ड होटल सेवामा ६.८ प्रतिशत नेपाली संलग्न छन् । 

अमेरिकामा रहेका नेपालकीको प्रतिव्यक्ति आम्दानी ३९ हजार ९ सय ९३ डलर रहेको र यो अमेरिकी प्रतिव्यक्ति आयभन्दा कम रहेको प्रतिवेदनमा उल्लेख छ ।

अध्ययनका क्रममा गरिएको सर्वेक्षणमा अमेरिकामा पढाइ गरिरहेका नेपाली विद्यार्थीहरूमध्ये ठूलो हिस्सा प्रविधि क्षेत्रमा आबद्ध रहेको देखिएको छ । सर्वेक्षणका अनुसार ४२.७ प्रतिशत नेपाली विद्यार्थीहरूले प्रविधि क्षेत्रमा अवसर खोजिरहेका छन् । प्रविधि क्षेत्रमा कार्यरत प्रवासी नेपालीहरूमध्ये ४१.५ प्रतिशतको आम्दानी ८० हजार डलरभन्दा बढी, १७.८ प्रतिशतको आम्दानी ४५ हजारदेखि ८० हजार डलरसम्म रहेको पाइएको छ । 

नेपाली महिला विद्यार्थीहरू प्रविधि र स्वास्थ्य क्षेत्रमा बढी सक्रिय देखिएका छन् भने पुरुष विद्यार्थीहरूको झुकाव प्रविधि क्षेत्रमा बढी देखिन्छ । प्रविधि क्षेत्रमा कार्यरत उच्च आय भएका नेपालीहरूले आफ्ना परिवारलाई ठूलो मात्रामा रेमिट्यान्स पठाउने सम्भावना रहेको अध्ययनले देखाएको छ । अमेरिकामा ८० हजार डलरभन्दा बढी कमाउने ७०.६० प्रतिशत नेपालीले १० हजार, २०.६ प्रतिशत नेपालीहरूले १० हजारदेखि ३० हजार डलर र ७ प्रतिशतले ३० हजारदेखि ५० हजार डलर रेमिट्यान्स नेपालमा पठाउने गरेका छन् । ‘सन् २०२३ मा अमेरिकाबाट नेपालमा अनुमानित १.२८ अर्ब डलर रेमिट्यान्स पठाएको हाम्रो अनुमान छ,’ प्रतिवेदनमा भनिएको छ, ‘यसले नेपालको कुल रेमिट्यान्सको ११.६ प्रतिशत हिस्सा ओगट्छ ।’