प्रमुख प्रशासकीय अधिकृतमाथि हातपातमा सलग्नलाई कारबाही नभएसम्म कर्मचारीले काम गर्न नसक्ने जनाएका छन्।
चितवन — चितवनको पहाडी भू–भाग समेटिएको इच्छाकामना गाउँपालिकाका प्रमुख प्रशासकीय अधिकृत चन्द्रकान्त बस्नेतमाथि कार्यकक्षमै हातपात भएको छ । बिहीबार बिहान ११ बजेको समयमा निर्माण व्यवसायी किङफिसर कन्सट्रक्सनका संचालक लालबहादुर तामाङसहितको ६ जनाको समूहले हातपात गरेको गाउँपालिकाले जनाएको छ ।
गाउँपालिकाकी उपाध्यक्ष माया सिलवालले ज्यान मार्ने उद्देश्यले प्रमुख प्रशासकीय अधिकृत माथि हातपात भएको भन्दै घटनामा संलग्नलाई पक्राउ गर्न प्रहरीलाई जानकारी गराइसकिएको बताइन् । घाइते प्रशासकीय अधिकृत बस्नेतको टाउको, मुख, नाक र शरीरका अन्य भागमा चोटपटक लागेको छ । उनको गाउँपालिकाकै अस्पतालमा उपचार भइरहेको उपाध्यक्ष सिलवालले जानकारी दिइन् ।
प्रशासकीय अधिकृत बस्नेतको कार्यकक्षमा अन्य दुई जना सेवाग्राही थिए । ती सेवाग्राहीलाई बाहिर निस्किन लगाएर ६ जनाको समूहले प्रमुख प्रशासकीय अधिकृतमाथि आक्रमण गरेका थिए ।
यसैबीच गाउँपालिकामा कार्यरत सम्पूर्ण कर्मचारीहरुले असुरक्षाको कारण देखाउँदै कामकाज ठप्प पारेका छन् । उनीहरुले सामूहिक विज्ञप्ती जारी गर्दै दोषी उपर कडा नगरेसम्म कामकाज गर्न असमर्थ रहेको जनाएका छन् ।
गाउँपालिकाले बैंक ग्यारेन्टी माग गरेको विषयमा कालिका नगरपालिका–२ स्थित पदमपुरमा रहेको किङफिसर कम्पनी र कार्यालयबीच विवाद थियो । किङफिसरले गाउँपालिकाविरुद्ध आदेश जारी गर्न माग गर्दै अदालतमा निवेदन दिए पनि चितवन अदालतले बुधबार मात्रै त्यस्तो आदेश दिन अस्वीकार गरेको थियो ।चितवन प्रहरीले घटनामा संलग्नको खोजी कार्य जारी रहेको जनाएको छ ।
