स्थानीय युवामा रगत दानबारे सचेतना जगाउन विभिन्न जिल्लामा गएर रक्तदान गर्दै आएको उनले बताए।
काठमाडौँ — नेपाल स्वयंसेवी रक्तदाता समाजका अध्यक्ष तथा नेपाल रेडक्रस सोसाइटीका केन्द्रीय कोषाध्यक्ष प्रेम सागर कर्माचार्यले मुगुको गमगढी पुगेर १८७ औं पटक रक्तदान गरेका छन्।
कर्माचार्यले विभिन्न जिल्लामा ३/३ महिनामा जाँदै रक्तदान गर्दै आएका छन् । स्थानीय युवामा सचेतना जगाउन विभिन्न जिल्लामा गएर रक्तदान गर्दै आएको उनले बताए । 'मानवीय जीवन बचाउनका लागि रक्तदान गर्नु नितान्त आवश्यक भएकोले युवाहरूमा रक्तदान गर्ने सचेतना वृद्धि होस् भन्ने हेतुले विभिन्न जिल्लामा गएर रक्तदान गर्दै आएको छु,' उनले भने ।
विशेषगरी पहाडी जिल्लामा रगत उपलब्ध हुन निकै कठिन हुने गरेको छ । कर्माचार्यले १८ वर्ष उमेर पुगेका करिब ४५ किलो तौल भएका सम्पूर्ण युवालाई रक्तदान गर्न आग्रह गरेका छन् । उनले दानमा दिएको रगतलाई बिरामी पक्षलाई निःशुल्क उपलब्ध गराउन पनि सरकारसँग माग गरेका छन् । उनले यसअघि कर्णाली प्रदेशकै सुर्खेत, जुम्ला, जाजरकोटलगायत विभिन्न दुर्गम जिल्लामा पुगेर रक्तदान गरिसकेका छन् ।
