सात महादेशमा लगातार सात दिनसम्म सात म्याराथन सञ्चालन हुने भएकोले यो प्रतियोगितालाई ‘७७७ म्याराथन’ भनिन्छ । ‘७७७ म्याराथन’ २०२६ मा जोशीसहित ३२ देशका ५६ धावक सहभागी थिए । अन्टार्कटिकाबाट सुरु भएको म्याराथन, अफ्रिकाको केप टाउन, अस्ट्रेलियाको पर्थ, एशियाको दुबई, स्पेनको म्याड्रिड, ब्राजील हुँदै सातौं दिनमा अमेरिकाको मायामीमा सम्पन्न भएको हो ।

सुर्खेतमा जन्मिएका ४१ वर्षीय जोशी दुई दशकदेखि अमेरिकामा छन् । टेक्सासको ड्यालस फोर्टवर्थ मेट्रोप्लेक्सको ग्रेपभाइन सिटीमा बस्ने जोशी पेशाले बैंकर्स हुन् । उनले ‘विश्व म्याराथन च्यालेन्ज’ लाई छोटो अवधिमा नेपाली सम्पदाको प्रचार गर्ने अवसरका रुपमा सदुपयोग गरेको बताए । 

‘यो चुनौतीपूर्ण म्याराथनलाई मातृभूमि नेपाल, नेपाली सम्पदा र संस्कृति चिनाउने अवसरका रुपमा लिएको थिएँ’, उनले भने, ‘आफू जन्मेको माटो र सम्पदाप्रतिको सम्मानका लागि गरिएको प्रयास सफल हुदा खुशी लागेको छ ।’ जोशीले सात दिन, सात महादेशमा सञ्चालित सात वटा म्याराथनमा फरक–फरक दौरा सुरुवाल लगाएका थिए । ती सबै दौरा सुरुवाल काठमाडौंका विश्व गौतमले तयार गरेका थिए ।